जनकपुरधाम, ५ मंसिर । जनकपुरधामस्थित निर्माणाधीन रामजानकी रंगशालाको अवस्थाबारे भौतिक पूर्वाधार तथा यातायात मन्त्री कुलमान घिसिङ र युवा तथा खेलकुद मन्त्री बब्लु गुप्ताले शुक्रबार बिहान स्थल भ्रमण गर्दै प्रत्यक्ष जानकारी लिएका छन् ।

लामो समयदेखि रोकिएको निर्माण कार्य, खेलमैदानको अवस्था तथा जिम्मेवारीप्रति सरोकारवाला निकायको उदासीनता सम्बन्धी विषयमा मन्त्रीद्वयले सम्बन्धित अधिकारीसँग छलफल गरेका हुन् ।

निरीक्षणका क्रममा मधेश प्रदेश खेलकुद मन्त्रालयका सचिव रञ्जित यादव, जिल्ला क्रिकेट संघका पदाधिकारी तथा स्थानीय खेलाडीहरूले रंगशालाको वर्तमान अवस्थाबारे विस्तृत जानकारी प्रदान गरेका थिए ।

खेलाडी तथा पदाधिकारीहरूले समयमै बजेट विनियोजन नहुनु, ठेकेदारको ढिलासुस्ती र व्यवस्थापनगत कमजोरीका कारण रंगशाला अपुरै अवस्थामा रहेको बताउँदै सरकारको त्वरित ध्यानाकर्षण गराएका थिए ।

यसै क्रममा मन्त्रीद्वय घिसिङ र गुप्ताले भासिएको कमला पुलको पनि अवलोकन गरेका छन् । निरीक्षणपछि मन्त्री घिसिङले कमला पुलबारे सरकार गम्भीर रहेको उल्लेख गर्दै पुल नयाँ बनाउने कि मर्मतमार्फत पुनर्स्थापना गर्ने बारेमा छिट्टै निर्णय लिने प्रतिबद्धता व्यक्त गरे । पुल जे विकल्पले भए पनि शीघ्र निर्माण गर्नुपर्नेमा आफूहरू सकारात्मक रहेको उनले बताए ।