जनकपुरधाम, ५ मंसिर । भगवान् राम र सीताको दिव्य मिलनको स्मरणमा मनाइने विवाहपञ्चमी महोत्सवअन्तर्गत शुक्रबार जनकपुरधाममा परम्परागत फूलबारी लीला भव्य रूपमा सम्पन्न भएको छ । साताव्यापी धार्मिक उत्सवको दोस्रो दिन विवाहमण्डप क्षेत्र भक्तजन, साधु–सन्त र पर्यटकहरूको भीडले भरिएको थियो ।

शुक्रबार साँझ जनकपुरधामको ऐतिहासिक स्थल विवाहमण्डपमा रामसीताको झाँकीसहित फूलबारी लीला प्रस्तुति गरिएको थियो । त्रेता युगमा जनकपुरमा आयोजना भएको धनुष यज्ञका क्रममा गुरु विश्वामित्रसँग आएका भगवान् राम र लक्ष्मणको सीतासँग फूल टिप्ने क्रममा भएको भेटघाटलाई स्मरण गर्दै हरेक वर्ष यो धार्मिक दृश्य अवतार गराइने परम्परा रहेको जानकी मन्दिरका महन्थ रामतपेश्वर दास वैष्णवले बताए ।

महन्थ वैष्णवले भने, ‘त्रेता युगमा राम, लक्ष्मण र सीताबीच फूल टिप्ने क्रममा भएको पहिलो भेट नै दिव्य कडीको शुरुवात मानिन्छ । यही आध्यात्मिक क्षण पुनस्र्मरण गर्न फूलबारी लीलालाई निरन्तरता दिइएको हो ।’

फूलबारी लीलाका क्रममा बगैँचाको प्रतीकात्मक वातावरणमा बनेको सजावट, पुष्पमालासहितको झाँकी तथा राम–लक्ष्मण–सीताको अभिनयले आस्था र भावनाले ओतप्रोत वातावरण सिर्जना गरेको थियो । स्थानीयवासी, भक्तजन तथा देश–विदेशबाट आएका पर्यटकहरूले वातावरणमा फैलिएको पवित्रता र सांस्कृतिक सौन्दर्यको अनुभव लिएका थिए ।

विवाहपञ्चमी अन्तर्गत शनिबार धनुष यज्ञ, आइतबार रामसीता तिलोत्सव, सोमबार जानकी मटकोर, मंगलबार ऐतिहासिक विवाहपञ्चमी र बुधबार जन्ती बिदाइसँगै महोत्सव औपचारिक रूपमा समापन हुनेछ । विवाहपञ्चमी नजिकिँदै जाँदा जनकपुरधाममा भक्तजनको भीड तीव्र गतिमा बढ्न थालेको छ ।

जनकपुरधाम उपमहानगरपालिकाले सुरक्षा व्यवस्था, सरसफाइ, सवारी व्यवस्थापन र सेवा केन्द्रहरूको समन्वयलाई अघि बढाउँदै महोत्सवलाई व्यवस्थित, सुरक्षित र आकर्षक बनाउने तयारी गरेको छ । स्थानीय व्यापार, होटल व्यवसायी तथा धार्मिक संस्थाहरू पनि महोत्सव सफल बनाउन सक्रिय देखिन थालेका छन् ।

विवाहपञ्चमी केवल धार्मिक कार्यक्रम मात्र नभई मिथिला सभ्यता, सांस्कृतिक पहिचान र आध्यात्मिक यात्राको प्रतिक मानिने भएकाले फूलबारी लीलाजस्ता कार्यक्रमले जनकपुरधामलाई त्रेता युगको पौराणिक सन्दर्भसँग जोडेर राख्ने कार्य महत्वपूर्ण मानिन्छ ।

तस्बिरहरू : घनश्याम मिश्र