सिरहा, ४ मंसिर । लहान नगरपालिकाले मुख्य बजार क्षेत्र हुलाकचोकमा आधुनिक सार्वजनिक शौचालय निर्माण कार्य सुरु गरेको छ ।

नगरप्रमुख महेशप्रसाद चौधरीले शिलान्यास गर्दै यस परियोजनाले लहानलाई स्वच्छ, सुरक्षित र पर्यटकीय दृष्टिले आकर्षक सहर बनाउने महत्वपूर्ण कदम भएको बताए ।

करिब ५० लाख रुपैयाँ लागतमा निर्माण हुने शौचालय यसै आर्थिक वर्षभित्र सम्पन्न हुने जनाइएको छ । नगरप्रमुख चौधरीका अनुसार बढ्दो जनसंख्या र पूर्व–पश्चिम महेन्द्र राजमार्गमा दैनिक यात्रुको चापलाई ध्यानमा राखेर वर्षौंदेखि पर्याप्त र आधुनिक सार्वजनिक शौचालयको अभाव रहेको थियो ।

नयाँ संरचना अत्याधुनिक प्रविधियुक्त ‘स्मार्ट शौचालय’ हुनेछ । त्यसमा महिला, ज्येष्ठ नागरिक, बालबालिका तथा अपाङ्गता भएका व्यक्तिलाई सहज पहुँच हुने व्यवस्था राखिने छ । शौचालयमा चमेनागृह, स्तनपान कक्ष र सेनेटरी प्याड भण्डारणको सुविधा उपलब्ध हुनेछ ।

माथिल्लो तल्लामा कफी सप सञ्चालन हुने र भुइँतल्लामा आधुनिक सुविधासहित चारपाङ्ग्रे सवारी धुने केन्द्र निर्माण हुनेछ । साथै, विद्युत सवारी साधन चार्जिङ स्टेसन समेत राखिने छ ।

नगरपालिकाले विगतमा कमजोर व्यवस्थापनका कारण प्रयोगविहीन बनेका करिब १५ सामुदायिक शौचालयलाई पनि स्तरोन्नति गरी सुधार गर्ने तयारी गरेको छ । नगरप्रमुख चौधरीले सार्वजनिक–निजी साझेदारी नीतिअनुसार आधुनिक सुविधा विस्तार गरिने जानकारी दिए ।

लहानमा सुरु भएको आधुनिक सार्वजनिक शौचालय परियोजनाले सहरलाई स्वच्छ, सुरक्षित र पर्यटकमैत्री बनाउने विश्वास गरिएको छ ।