बारा, ४ मंसिर । बाराको सिमरामा बिहीबार बिहानदेखि सुरु भएको जेनजी आन्दोलन उग्र बन्दै जाँदा आन्दोलनकारी र सुरक्षाकर्मीबीच दोहोरो भिडन्त भएको छ । भीड नियन्त्रणका क्रममा दुवै पक्षमा चोटपटक पुगेका छन् ।

बिहान १० बजेतिर सिमरा चोकमा सुरु भएको प्रदर्शन नियन्त्रणबाहिर पुगेको जिल्ला प्रहरी कार्यालय बाराले जनाएको छ । भिडन्तका क्रममा चारजना जेनजी युवा र ६ जना प्रहरी जवान घाइते भएका छन् ।

जितपुर सिमरा अस्पतालले सार्वजनिक गरेको तथ्यांक अनुसार घाइतेमध्ये निलहरी सापकोटा, निशान श्रेष्ठ, सुमित चौधरी र सन्देश घिमिरेको उपचार भइरहेको छ । तीमध्ये निलहरी सापकोटा र निशान श्रेष्ठलाई गम्भीर चोट लागेकाले थप उपचारका लागि वीरगञ्जस्थित एल.एल न्युरो अस्पताल पठाइएको अस्पतालले जानकारी दिएको छ ।

उता, जिल्ला प्रहरी कार्यालय बाराका प्रवक्ता विजय पण्डितका अनुसार भीडलाई तितर–बितर पार्ने क्रममा ६ जना प्रहरी जवान सामान्य रूपमा घाइते भएका छन् ।

आन्दोलन उग्र बन्दै गएपछि क्षेत्रीय सुरक्षा सतर्कता बढाइएको छ भने सिमरा चोक आसपासमा थप प्रहरी परिचालन गरिएको बताइएको छ ।