जनकपुरधाम, ४ मंसिर । मधेश प्रदेशमा मुख्यमन्त्री निवासको व्यवस्थालाई लिएर सत्ताको केन्द्रमै राजनीतिक हलचल बढेको छ ।

नवनियुक्त मुख्यमन्त्री सरोजकुमार यादवले निवास खाली गरिदिन गरेको आग्रहमा तत्काल प्रतिक्रिया नआएपछि विषय दलका शीर्ष नेतासम्म पुगेको छ ।

निवर्तमान मुख्यमन्त्री जितेन्द्र प्रसाद सोनललाई फोनमार्फत निवास खालीको अनुरोध गर्दा पनि कुनै जवाफ नआएपछि मुख्यमन्त्री यादवले लोसपा संसदीय दलका नेता जयनुल राइन तथा प्रमुख सचेतक रमिता प्रधानसँग सहयोग मागेर विषयलाई औपचारिक रूपमा अघि बढाएका हुन् ।

निवास व्यवस्थाको अभावले क्षमता र औपचारिकतामा समस्या परेको बताउँदै मुख्यमन्त्री यादवले भने, ‘अदालतले दीर्घकालीन असर पर्ने निर्णय नगर्न भनेको हो । तर, दैनिक काम रोकिँदैन । म भाडाको घरमै बस्दै आएको छु । विभिन्न डेलिगेसन भेट्न आउँछन्, सुरक्षा निकायले पनि निवासमै बस्न सुझाव दिएको छ । तपाईंहरू दलको सचेतक भएकाले निवास खाली गरिदिन आग्रह गरेको हुँ ।’

यादवका अनुसार निवास नपाउँदा बैठक, सुरक्षा तथा प्रशासनिक भेटघाटमै समेत बाधा उत्पन्न भएको छ ।

लोसपा प्रमुख सचेतक रमिता प्रधानका अनुसार सोनल निवास छाड्न पहिले नै सहमत थिए । तर, बाहिरी राजनीतिक दबाबले विषय जटिल बनेको हो ।उनले भनिन्, ‘सोनलजी बुधबार नै निवास खाली गर्न तयार हुनुहुन्थ्यो । तर, सात दलबाट निरन्तर दबाब आएपछि उहाँ रोकिनुभयो ।’

मुख्यमन्त्री यादवले जयनुल राइनलाई फोनमार्फत सम्पूर्ण परिस्थिति बारे जानकारी गराउँदै आफू विवाद सिर्जना गर्ने पक्षमा नरहेको दोहोर्याए । उनका अनुसार, ‘दलका नेताहरूलाई जानकारी गराउँदै छु । मैले नगरेको भए पनि विवाद झिक्ने मनसाय मेरो छैन ।’

यता, निवर्तमान मुख्यमन्त्री सोनलले आफू निवास छाड्ने तयारीमै रहेको प्रतिक्रिया दिएका छन् । उनले भने, ‘वर्तमान मुख्यमन्त्रीलाई सहज बनाउन काम भइरहेको छ । निवास खाली गर्ने प्रक्रियामा छु । छिट्टै उहाँ निवासमा प्रवेश गर्नुहुनेछ ।’