जनकपुरधाम, ४ मंसिर । मधेश प्रदेशका निवर्तमान सभामुख रामचन्द्र मण्डलले पदबाट हटाइएपछि आफूले प्रयोग गर्दै आएका सबै सरकारी सेवा सुविधा फिर्ता गरेका छन् । मण्डलले बिहीबार सरकारी निवास खाली गर्दै प्रदेशसभा सचिवालयलाई सवारीसाधनसमेत बुझाएका हुन् ।

यसअघिको विवादित घटनाक्रमपछि बुधबार बसेको प्रदेशसभाको बैठकले दुई तिहाइ बहुमतले प्रस्ताव पारित गर्दै मण्डललाई सभामुख पदबाट पदमुक्त गरेको घोषणा गरेको थियो । उपसभामुख बबिता कुमार राउत ईशरले छैटौँ अधिवेशनको सातौँ बैठकमा प्रस्तावको पक्षमा ७६ मत परेकाले मण्डल पदमुक्त भएको घोषणा गरेकी थिइन् ।

मण्डलविरुद्ध पेश भएको प्रस्तावमा सात दलीय गठबन्धनका सांसदहरूको एकमत समर्थन रहेको थियो । तर, नेकपा एमालेका सांसदहरू दोस्रो चरणदेखि बैठकमा अनुपस्थित रहे । प्रारम्भिक चरणमा एक सांसद उपस्थित भए पनि बैठक स्थगित भएर पुनः बस्दा एमाले शून्य उपस्थिति थियो ।

मण्डलले केही दिन अघि पाँच सांसदलाई पदच्युत गर्ने निर्णय गरेको कदमलाई सात दलले ‘अवैध’ र ‘पदीय आचरणविपरीत’ भन्दै विरोध जनाउँदै आएका थिए । यही घटनालाई मुख्य आधार बनाउँदै गत कार्तिक २७ गते सात दलीय गठबन्धनका ६४ सांसदले मण्डलविरुद्ध प्रस्ताव दर्ता गरेका थिए ।

उपसभामुख ईशरको निर्देशनमा बोलाइएको बुधबारको बैठकमा नेपाली कांग्रेसका प्रमुख सचेतक कुमारकान्त झाले प्रस्ताव सदनमा पेस गरेका थिए । छलफलका क्रममा जसपा नेपाल, नेपाली कांग्रेस, लोसपा, नेकपा एसलगायत दलका सांसदहरूले मण्डलको पछिल्लो कार्यशैलीले सदन ‘अवरोध र संकट’मा पारेको आरोप लगाउँदै प्रस्तावको समर्थनमा धारणा राखेका थिए ।

लोसपाका उपेन्द्र महतो, जसपाका मनिषकुमार सुमन, सञ्जयकुमार यादव, राजकुमार गुप्ता, कांग्रेसकी जीवछीदेवी यादव, नेकपा एसका गणेश पटेल र प्रमोद यादवले छलफलमा भाग लिएका थिए ।

मत विभाजन प्रक्रियामार्फत ७६ मत प्रस्तावको पक्षमा खसेपछि मण्डल तत्कालै सभामुख पदबाट हटाइएका हुन् ।