सप्तरी, ३ मंसिर । सप्तरी जिल्लामा नयाँ मतदाता नामावलीमा ११ हजार ६ सय ७७ जना थपिएका छन् ।

यससँगै जिल्लामा मतदाताको कुल संख्या ४ लाख ३० हजार ४ सय ५९ पुगेको छ । नयाँ मतदातामध्ये ६ हजार १८९ जना पुरुष र ५ हजार ४८८ जना महिला रहेका छन् ।

जिल्ला निर्वाचन कार्यालय सप्तरीका अनुसार गत असोज १० गतेदेखि नयाँ मतदाता नामावली दर्ता सुरु गरिएको थियो । असोज महिनामा १ हजार ८६४ जना र कार्तिक ३० गतेसम्म ९ हजार ८१३ जनाले नाम दर्ता गराएका थिए ।

निर्वाचन कार्यालय सप्तरीका प्रमुख रमेश जोशीले नयाँ पुस्ताका मतदाताले बढी उत्साहका साथ नाम दर्ता गराउने गरेको बताएका छन् । उनले भने, ‘सुरूमा नाम दर्ता गर्न आउने संख्या कम थियो । तर, पछिल्लो समय कार्यालयमा भीड बढेको छ ।’

मतदाता नामावलीमा नाम दर्ता गर्ने समय पहिलो चरण असोज मसान्तसम्म र दोस्रो चरण कार्तिक मसान्तसम्म तोकिएको थियो । तर, समय बढाएर मङ्सिर ५ गतेसम्म नाम दर्ता गर्न सकिने व्यवस्था गरिएको छ ।

पहिलो पटक मतदान गर्न योग्य भएका युवाहरू उत्साहित देखिएका छन् । सप्तरी जिल्लामा यसअघि ४ लाख १८ हजार ७ सय ८२ मतदाता थिए । नयाँ मतदाता थपिएपछि जिल्लाको मतदाता संख्यामा उल्लेख्य वृद्धि भएको छ ।