सर्लाही, ३ मंसिर । सर्लाही जिल्लामा कृषि प्रयोजनका लागि जडान गरिएका १७ वटा ट्रान्सफर्मर चोरी गर्ने गिरोह प्रहरीले पक्राउ गरेको छ ।

गिरोहमा पाँच जना नेपाली र चार जना भारतीय नागरिक रहेका छन् । जिल्ला प्रहरी कार्यालय सर्लाहीका प्रहरी उपरीक्षक योगेन्द्रकुमार खड्काले बुधबार पत्रकार सम्मेलन गर्दै घटना र पक्राउबारे जानकारी दिएका छन् ।

पक्राउ पर्ने नेपाली नागरिकहरूमा इलामको माइजोगमाइ–४ का २८ वर्षीय दुर्गा अधिकारी, सिन्धुपाल्चोक पाखर–१ का ४२ वर्षीय सोनाम लामा, महोत्तरी बर्दिवास–३ का ५३ वर्षीय बुधे माझी, पर्सा वीरगंज–१६ का ३३ वर्षीय दिलिपकुमार ओझा र बाराको जितपुर सिमरा–६ का ३९ वर्षीय कृष्ण श्रीवास्तव रहेका छन् । त्यस्तै, भारतीय नागरिक ५० वर्षीय सुखाडी सहनी, २० वर्षीय सरोजकुमार सहनी, ५५ वर्षीय मो.रयाजुल र ३५ वर्षीय संजित पदार्थ समेत पक्राउ परेका छन् ।

पक्राउ परेका व्यक्तिहरूको साथबाट चोरी गरिएको ट्रान्सफर्मरको तार १०३.८ केजी, चोरीमा प्रयोग गरिएको ५१ वटा औजार र दुई थान ई–रिक्सा बरामद गरिएको प्रहरीले जनाएको छ । ट्रान्सफर्मर चोरीको घटनाले किसान र स्थानीय प्रशासन दुवै हैरान भएका थिए ।

एसपी खड्काका अनुसार चोरीमा संलग्न गिरोहले सिन्धुपाल्चोकका सोनाम लामासँग मिलेर चारवटा मुद्दा चलाइरहेका थिए भने महोत्तरीका बुधे माझीविरुद्ध कर्तव्य ज्यान, डाँका र अभद्र व्यवहारसम्बन्धी पाँच मुद्दा दर्ता भइसकेको थियो ।

भारतीय नागरिक सुखाडी सहनीले पनि चोरीमा संलग्न नेपालीसँग मिलेर ट्रान्सफर्मरको स्थिति र त्यसको बिक्रीसम्बन्धी योजना बनाउने गरेको पाइएको छ ।

पक्राउ पर्ने कृष्ण श्रीवास्तवले आफ्नो गढिमाई मेटल प्रा.लि.मार्फत चोरी गरिएको ट्रान्सफर्मरको तामा पगालेर भाँडाहरु बनाइ बिक्री गर्दै आएको खुलेको छ । सर्लाही प्रहरीले गिरोह समातिएपछि अब ट्रान्सफर्मर चोरीका घटनाहरु नघट्ने विश्वास व्यक्त गरेको छ ।

सर्लाहीमा १७ वटा ट्रान्सफर्मर चोरी हुँदा करिब एक करोड १० लाख ५० हजार रुपैयाँ बराबरको क्षति भएको प्रहरीले जनाएको छ । चोरीका कारण सिँचाइमा समस्या आएको स्थानीय किसानहरूले बताउँदै आएका छन् ।