जनकपुरधाम, ३ मंसिर । मधेश प्रदेश सभाका सभामुख रामचन्द्र मण्डल पदमुक्त भएका छन् ।

पदीय आचरण विपरीत काम गरेको अभियोग लागेसँगै बुधबार बसेको प्रदेश सभाको बैठकले दुई तिहाइ बहुमतले प्रस्ताव पारित गर्दै मण्डललाई पदमुक्त गरेको घोषणा गरिएको हो ।

प्रदेश सभाको बुधबार बसेको छैटौँ अधिवेशनको सातौँ बैठकमा उपसभामुख बबिताकुमार राउत ईशरले प्रस्तावको पक्षमा ७६ मत परेकाले सभामुख मण्डल पदमुक्त भएको घोषणा गरिन् । प्रस्ताव पारित हुन प्रदेश सभामा दुई तिहाइ मत आवश्यक हुने प्रावधान छ ।

मण्डलविरुद्ध दर्ता भएको प्रस्तावमा सात दलीय गठबन्धनका सांसदहरूले समर्थन जनाएका थिए । तर, नेकपा एमालेका सांसदहरू भने दोस्रो चरणमा सुरु भएको बैठकमा सहभागी भएनन् । प्रारम्भिक चरणमा एकजना सांसद उपस्थित भए पनि बैठक स्थगित भएर पुनः सुरु भएपछि एमाले शून्य उपस्थिति रहेको थियो ।

सभामुख मण्डलले केही दिनअघि ५ सांसदलाई पदच्युत गर्ने निर्णय गर्दै सभामुख पदको अधिकार दुरुपयोग गरेको आरोप लागेको थियो । सो कदमलाई सात दलले अवैध, एकल निर्णय र पदीय आचरण विपरीत भन्दै विरोध गर्दै आएका थिए ।

गत कार्तिक २७ गते सात दलीय गठबन्धनका ६४ सांसदले पद अनुकूल आचरण नगरेको आरोपसहित मण्डलविरुद्ध प्रस्ताव दर्ता गरेका थिए ।

उपसभामुख ईशरको निर्देशनमा आजको बैठक बोलाइएपछि नेपाली कांग्रेसका प्रमुख सचेतक कुमारकान्त झाले प्रस्ताव सदनमा पेस गरे ।

छलफलका क्रममा जसपा नेपाल, कांग्रेस, लोसपा, एकीकृत समाजवादीका सांसदहरूले मण्डलको कार्यशैली र पछिल्ला कदमले सदनलाई अप्ठ्यारोमा पारेको तर्क गर्दै प्रस्तावलाई समर्थन गरे ।

छलफलमा लोसपाका उपेन्द्र महतो, जसपाका मनिषकुमार सुमन, सञ्जयकुमार यादव, राजकुमार गुप्ता, कांग्रेसकी जीवछीदेवी यादव, नेकपा एसका गणेश पटेल र प्रमोद यादवले धारणा राखेका थिए ।

छलफल सकिएपछि प्रस्ताव निर्णयार्थ प्रस्तुत गरियो । मत विभाजन प्रक्रियामार्फत ७६ मत प्रस्तावको पक्षमा खसेपछि मण्डल तत्कालै सभामुख पदबाट हटाइएका हुन् ।