जनकपुरधाम, ३ मंसिर । मिथिला इन्स्टिच्युट अफ टेक्नोलोजी (मिट) क्याम्पस जनकपुरधामका तीन विद्यार्थीले चिकित्सा शिक्षा आयोगद्वारा लिइएको एमबिबिएस प्रवेश परीक्षामा उत्कृष्ट सफलता हासिल गर्दै नाम निकाल्न सफल भएका छन् । क्याम्पसले उनीहरूलाई विशेष सम्मान गर्दै सफलताको खुसी साझा गरेको हो ।

क्याम्पसका विद्यार्थी अर्जुन मण्डल (रोल नं. १३२), मुरली शर्मा (रोल नं. १५३) र प्रथम प्रयासमै सफल स्नेहा झा (रोल नं. २५३) ले २०८२ को प्रवेश परीक्षामा प्रतिस्पर्धी हजारौँ विद्यार्थीबीच उत्कृष्ट स्थान बनाएका हुन् । उनीहरूमध्ये स्नेहा झाको अनुपस्थितिमा उनको सम्मानका रूपमा उनका बुवा सुदिष्ट नारायण झाले प्रमाणपत्र ग्रहण गरेका थिए ।

बुधबार क्याम्पसमा आयोजित सम्मान समारोहमा क्याम्पसका अध्यक्ष विनोद साह, प्राध्यापक तथा शिक्षकहरूले अबिर, टीका र दोसल्ला ओढाइ उत्कृष्ट प्रदर्शन गर्ने विद्यार्थीलाई सम्मान गरे । कार्यक्रमलाई बधाई तथा शुभकामना व्यक्त गर्दै अध्यक्ष साहले क्याम्पसले निरन्तर गुणस्तरीय शिक्षा र उत्कृष्ट वातावरण प्रदान गर्दै आएको दाबी गरे ।

सम्मान ग्रहण गर्दै विद्यार्थीहरूले क्याम्पसको शिक्षण पद्धति, शिक्षकहरूको मार्गदर्शन र आफ्नै मेहनतले सफलता हासिल गर्न मद्दत पुगेको बताए । उनीहरूले प्लस टूको पाठ्यक्रममै आधारित प्रश्नहरू हुने भएकाले नियमित अध्ययन र केन्द्रित तयारीले मेडिकल प्रवेश परीक्षा सफलतापूर्वक पार गर्न सकिने अनुभव साझा गरे ।

कार्यक्रममा सहभागी अभिभावक र क्याम्पस परिवारले सफल विद्यार्थीको उज्ज्वल भविष्यको शुभकामना व्यक्त गर्दै क्याम्पसले आगामी दिनमा पनि यस्तै सफलता दोहोर्याउने विश्वास व्यक्त गरे ।

सोही कार्यक्रममा पत्रकारितामार्फत शैक्षिक क्षेत्रको प्रवद्र्धनमा योगदान पुर्याउँदै आएका स्थानीय सञ्चारकर्मीहरूलाई समेत सम्मान गरिएको थियो ।