जनकपुरधाम, ३ मंसिर । सभामुख रामचन्द्र मण्डलविरुद्ध दर्ता भएको ‘पदअनुकूल आचरण नगरेको’ प्रस्तावमाथि छलफलका लागि आज दिउँसो १ बजेतिर बोलाइएको मधेश प्रदेश सभा बैठक सचिवालयको अव्यवस्थाका कारण अझै सुरु हुन सकेको छैन ।

प्रदेशसभा सदस्यहरू सदन परिसरमा भेला भइसके पनि बैठक सञ्चालनका लागि आवश्यक प्रमुख पदाधिकारीहरू अनुपस्थित भएपछि कार्यसूची पूर्णरूपमा ठप्प भएको हो ।

प्रदेश सभाका सचिव वासुप्रसाद कोइराला बिदामा छन् भने कार्यवाहक सचिवको जिम्मेवारी पाएका होमप्रसाद पहाडी पनि आज कार्यालय आएनन् । त्यसमाथि प्रवक्ता तथा उपसचिव विपिन ठाकुर समेत अनुपस्थित रहेपछि सदन सञ्चालनको कानुनी तथा प्राविधिक प्रक्रिया अघि बढ्न सकेको छैन ।

बिजुली अवरोधपछि वैकल्पिक सप्लाईका लागि ल्याइएको जेनेरेटर समेत लाइन आएपछि फिर्ता पठाइएको थियो । तर, प्राविधिक तयारी पूरा हुँदाहुँदै नेतृत्व पक्ष अनुपस्थित भएपछि बैठक अल्झिएको प्रदेशसभा स्रोतले बतायो ।

आजको बैठकमा सभामुख मण्डलविरुद्ध सात दलका ६४ प्रदेश सभा सदस्यले दर्ता गरेको प्रस्तावमाथि छलफल गर्ने कार्यसूची थियो । नेपाली कांग्रेससहित गठबन्धन दलहरूले सभामुख मण्डलले ‘पदअनुकूल आचरण नदेखाएको’ दाबी गर्दै प्रस्ताव दर्ता गराएका थिए ।

यसअघि मंगलबार ३२ प्रदेशसभा सदस्यले उपसभामुख बबिता राउत ईशरलाई बैठक आह्वान गर्न पत्र बुझाएका थिए । सो पत्रका आधारमा इशरले आज १ बजेका लागि बैठक बोलाएर सम्पूर्ण सदस्यलाई सूचना पठाएकी थिइन् । तर, बैठक सुरु हुन नसक्दा आज नै प्रस्ताव अघि बढ्ने कि नबढ्ने अन्योल छाएको छ ।

सदनमा उपस्थित सदस्यहरू आ–आफ्नो दलका नेतृत्वसँग परामर्शमै देखिए भने सचिवालयका अधिकारीहरू किन अनुपस्थित भए भन्ने विषयमा आधिकारिक स्पष्टीकरण भने आएको छैन ।