बारा, ३ मंसिर । स्थानीय प्रशासनले जारी गरेको कर्फ्यू आदेशको बेवास्ता गर्दै बाराको सिमरा बजार क्षेत्रमा बुधबार ठूलो संख्यामा युवाहरू सडकमा ओर्लिएका छन् ।

नेकपा एमालेका नेता–कार्यकर्ता र जेनजी युवाबीचको चर्किएको विवादका कारण उत्पन्न जोखिम हेर्दै जिल्ला प्रशासन कार्यालयले दिउँसो १२ः३० बजेदेखि राति ८ बजेसम्म कर्फ्यू लागू गरेको थियो । तर, कर्फ्यूले रोक्न नसक्ने गरी युवाहरू मुख्य चोकदेखि विमानस्थल क्षेत्रसम्म नाराबाजीसहित प्रदर्शनमा लागिपरे । सुरक्षाकर्मीहरूले लगातार माइकिङ गर्दै भीडलाई घर फर्कन आग्रह गरे पनि प्रदर्शनकारी पन्छिएनन् ।

प्रशासनले गण्डक नहरदेखि पथलैया सडकखण्डको दायाँ–बायाँ ५०० मिटर साथै सिमरा विमानस्थलको वरिपरि ५०० मिटर क्षेत्रमा सभा, जुलुस, भेला, प्रदर्शन तथा कुनै पनि भीडभाडमा कडाइका साथ प्रतिबन्ध लगाएको थियो ।

बुधबार बिहानै सिमराको बजार क्षेत्रमा एमाले कार्यकर्ताले जेनजी अगुवा सम्राट उपाध्यायमाथि हातपात गरेपछि वातावरण तनावग्रस्त हुँदै गएको थियो । सो घटनापछि आक्रोशित युवाहरू समूह–समूहमा जम्मा हुँदै विमानस्थलतर्फ अघि बढे ।

यसअघि एमालेले बाराको परवानीपुरमा प्रदेशस्तरीय युवा भेला आयोजना गरेको थियो । सभालाई सम्बोधन गर्न उपाध्यक्ष शंकर पोखरेल, पोलिट्ब्युरो सदस्य महेश बस्नेतलगायतका शीर्ष नेता काठमाडौंबाट सिमरा आउँदै थिए । कार्यक्रमलाई लक्षित गर्दै जेनजी अगुवा उपाध्यायले मंगलबार बेलुकी सामाजिक सञ्जालमार्फत शान्तिपूर्ण विरोध प्रदर्शनको आह्वान गरेका थिए ।

उक्त आह्वानपछि बुधबार बिहानैदेखि नै दुई समूहबीच तनाव बढ्दै गयो । उपाध्यायमाथि भएको हातपातपछि आक्रोशित युवाहरू विमानस्थलको मुख्य गेटमै भेला भए । उनीहरूले ढुंगा, सिसाका बोतल प्रहार गर्दै नाराबाजी गरेपछि सुरक्षाकर्मीले बल प्रयोग गर्नु पर्यो । प्रहरीले भीड नियन्त्रणका लागि अश्रुग्यास र लाठीचार्ज गर्यो । त्यस क्रममा प्रहरी र जेनजी युवाबीच प्रत्यक्ष झडपसमेत भयो ।

उता, एमाले महासचिव शंकर पोखरेल, नेता महेश बस्नेतलगायतलाई स्वागत गर्न स्थानीय नेता अच्युत मैनाली, किशान श्रेष्ठ, ज्वाला साहसहितका व्यक्तिहरू विमानस्थलमै पुगेका थिए । नेताहरू भित्रिएसँगै बाहिर भीड अझै आक्रामक बन्दै गए ।

स्थिति शान्त हुन थाले पनि सुरक्षाकर्मी उच्च सतर्कतामा रहेका थिए । तनाव झन् फैलिन नदिने उद्देश्यले विमानस्थल, मुख्य चोक र संवेदनशील नाकाहरूमा अतिरिक्त सुरक्षा व्यवस्था परिचालन गरिएको प्रशासनले जनाएको छ ।