जनकपुरधाम, ३ मंसिर । जनता समाजवादी पार्टी (जसपा) नेपालका मधेश प्रदेश संसदीय दलका नेता सरोजकुमार यादवले सभामुख रामचन्द्र मण्डलविरुद्ध दर्ता भएको आचरणसम्बन्धी प्रस्ताव अब सात दिनभित्रै प्रक्रियामा जाने दाबी गरेका छन् ।

बुधबार जनकपुरधाममा पत्रकारसँग कुरा गर्दै उनले उपसभामुखले सो समयभित्र प्रदेशसभा बैठक आह्वान गर्ने र संवैधानिक कार्यबिधिअनुसार प्रस्ताव अगाडि बढ्ने स्पष्ट पारे ।

नेता यादवका अनुसार सभामुखविरुद्धको प्रस्तावमा हुने मतदानमा दलगत ह्विप लागू हुनेछ । ‘जुनसुकै भोटिङ प्रक्रियामा पनि पार्टीको ह्विप लाग्छ । यसमा किन नलाग्ने?’ उनले भने । यादवले यो प्रस्तावलाई पार्टीगत निर्णयअनुसार नै अघि बढाइने बताए ।

उनका अनुसार उपसभामुखले बोलाउने बैठकमा प्रस्तावक सांसदले प्रस्ताव पेस गर्नेछन्, समर्थकले समर्थन जनाउनेछन् र त्यसपछि खुला छलफल हुनेछ ।

‘छलफलपछि सभामुखलाई पनि आफ्नो सफाइ राख्न सदनले समय दिन्छ,’ यादवले भने, ‘सफाइ पेस भएपछि मात्रै प्रस्ताव निर्णयार्थ भोटिङमा जान्छ ।’

यादवका अनुसार प्रस्ताव पारित हुन सभामुख हटाउने पक्षमा प्रदेशसभाको दुई तिहाइ बहुमत आवश्यक हुनेछ । त्यस्तो बहुमत जुटेमा सभामुख रामचन्द्र मण्डल तत्काल पदमुक्त हुनेछन् ।

बुधबारको बैठकमा सभामुख मण्डल नआएको विषयमा प्रतिक्रिया दिँदै यादवले भने, ‘सचिवालयले सबै माननीयलाई सूचना पठाएको छ ।उहाँलाई पनि प्रस्ताव दर्ता भएको थाहा छ । बैठकमा सहभागी हुने नहुने उहाँको व्यक्तिगत निर्णय हो ।’

केही दिनअघि ७४ सांसदको हस्ताक्षरसहित सभामुख मण्डलविरुद्ध आचरणसम्बन्धी प्रस्ताव दर्ता गरिएको थियो । त्यसयता प्रदेश सभाको राजनीतिक घमासान चर्किँदै गएको छ ।