जनकपुरधाम, ३ मंसिर । धनुषाको जनकनन्दिनी गाउँपालिकामा साउन महिनादेखि हालसम्म तलब नपाएको भन्दै शिक्षक, शिक्षिका तथा कर्मचारीहरू बुधबारदेखि धर्नामा बसेका छन् ।

तलब अभावका कारण दैनिक खर्च चलाउनै कठिन भएकाले आफूहरू आन्दोलनमा जान बाध्य भएको उनीहरूको भनाइ छ ।

बुधबार गाउँपालिका कार्यालय पुगेर उनीहरूले प्रमुख प्रशासकीय अधिकृतलाई ज्ञापनपत्र बुझाए । ज्ञापनपत्रमा महिनौँदेखि रोकिएको तलब तत्काल उपलब्ध गराउन माग गरिएको छ । उनीहरूले यदि माग सम्बोधन नभए थप कडा आन्दोलनको कार्यक्रम घोषणा गर्ने चेतावनी दिएका छन् ।

शिक्षक तथा कर्मचारीहरूले निरन्तर सेवा–शिक्षण प्रदान गरिरहे पनि प्रशासनले तलब रोक्नु अन्यायपूर्ण भएको बताएका छन् । ‘स्कूलमा कक्षाहरू नियमित सञ्चालन भइरहेका छन् । कार्यालयका कामहरू पनि यथावत् गर्दै आएका छौँ । तर, तलब नपाउँदा परिवार पाल्न समस्या भएको छ,’ एक शिक्षकले भने ।

धर्नाका क्रममा सहभागीहरूले पालिकाको काम कारबाहीमा सवाल उठाउँदै आर्थिक अनुशासनभित्र तलब वितरण किन अवरुद्ध भयो भन्नेबारे स्पष्ट पार्न माग गरे । उनीहरूले भने, ‘हामी प्रतिवद्ध भएर सेवा दिइरहेका छौँ । तर, राज्यले नै हाम्रो आधारभूत अधिकार कटौती गर्यो भने चुप लागेर बस्न सकिँदैन ।’

गाउँपालिकाको तर्फबाट भने कुनै औपचारिक प्रतिक्रिया आएको छैन । तलब रोकिएको कारणबारे स्पष्टीकरण नआएसम्म शिक्षक कर्मचारीहरूको आन्दोलन थप चर्किने देखिएको छ ।