जनकपुरधाम, ३ मंसिर । मधेश प्रदेशको राजनीतिक रस्साकस्सीबीच सभामुख र उपसभामुखबीचको विवाद सतहमा आएको छ ।

सभामुख रामचन्द्र मण्डलले उपसभामुख बबिता राउत ईशरले विधि–विधान र स्थापित प्रक्रियाविपरीत आज प्रदेश सभा बैठक आह्वान गरेको आरोप लगाउँदै आपत्ति जनाएका छन् ।

सभामुख मण्डलले भने, ’प्रदेश सभाको नियमावली र संविधानले दिएको अधिकारलाई पन्छाएर एकलौटी ढंगले बैठक बोलाइनु पूर्ण रूपमा गैरकानुनी कदम हो ।’

उनका अनुसार उपसभामुखले सभामुख अनुपस्थित वा असक्षम भएको औपचारिक घोषणा समेत बिना बैठक बोलाएको, कार्यसूची तोकेको र सचिवालयलाई निर्देशन दिएको कार्यले प्रदेश सभामा दलीय स्वार्थ हाबी हुने प्रवृत्ति झनै बलियो बनेको छ ।

मण्डलका अनुसार प्रदेश सभा बैठक आह्वान गर्ने अधिकतम अधिकार सभामुखकै हुन्छ । कुनै कारणवश सभामुखले बैठक बोलाउन नसकेमा मात्र उपसभामुखले दस्तावेजसहित औपचारिक जिम्मेवारी पाउने व्यवस्था छ ।

उनले उपसभामुखको कदमलाई राजनीतिक निर्देश पालना गरेको जस्तो देखिएको भन्दै संस्थागत मर्यादा उलङ्घन भएको टिप्पणी पनि गरे ।
उपसभामुख बबिता राउत ईशरले आज प्रदेश सभा बैठक आह्वान गरेकी छन् । सचिवालयले सामाजिक सञ्जाल समूहमार्फत सांसदहरूलाई बैठकमा उपस्थित हुन सूचना पठाएको थियो । यही सूचना सार्वजनिक भएपछि विवाद चर्किएको हो ।

सचिवालयभित्रै दुई धार देखिएको बताइन्छ । एक समूहले उपसभामुखको कदमलाई वैधानिक मानिरहेको छ भने सभामुख नबोलाउँदा सभा ठप्प हुने भन्दै अर्को समूहले वैकल्पिक अधिकार प्रयोग गरिएको दाबी गरेको छ ।

सभामुख मण्डलले उपसभामुखले उठाएको कदमलाई सिरानबाटै बनाइएको राजनीतिक जाल जस्तो रहेको आरोप समेत लगाए । उनले भने, ’सरकार बनाउने र भत्काउने खेलमा प्रदेश सभा संस्थालाई हतियार बनाइँदैछ । उपसभामुखको आजको कदम त्यसैको विस्तार हो ।’

उनका अनुसार यस्तो कदमले प्रदेश सभाको विश्वसनीयता र निष्पक्षता गम्भीर संकटमा पारेको छ । मधेश प्रदेशमा पछिल्ला दिनहरूमा बढ्दो राजनीतिक तनावका कारण प्रदेश सभा लगातार विवादमा छ ।

विश्वासको मत, सभामुखको भूमिकामाथि उठेका प्रश्न, कार्यसूची निर्धारणमा देखिएको द्धन्द्व तथा नयाँ सत्ता संयोजनको प्रयासले दलगत ध्रुवीकरण झनै चर्काएको छ ।

उता, उपसभामुख पक्षले भने सभामुखले राजनीतिक उद्देश्य बोकेर बैठक रोकेको आरोप लगाउँदै आएको छ । प्रदेशसभाभित्र बढ्दो आरोप–प्रत्यारोप र प्रक्रिया उल्लङ्घनका विवादले जनतामाझ संसदीय अभ्यास नै गम्भीर प्रश्नमा परिरहेको टिप्पणी विश्लेषकहरू गर्दै आएका छन् ।

सभामुख मण्डलले भने, ’मैले निष्पक्षता र संविधानअनुसार नै काम गर्दै आएको छु । दलीय लाभका लागि मथिङ्गल तेस्र्याउनेहरूलाई तथ्यले नै जवाफ दिनेछ ।’