सिरहा, ३ मंसिर । सिरहाको कल्याणपुर नगरपालिका–१२ बेलहामा मध्यराति डाँका समूहले गरेको गोली प्रहारमा बुबा–छोरा गम्भीर घाइते भएका छन् ।

घाइते हुनेमा ४२ वर्षीय वीरेन्द्र कुमार महतो र उनका २२ वर्षीय छोरा अनिल कुमार महतो रहेका छन् ।

सिरहाका प्रहरी प्रवक्ता डीएसपी रमेश बहादुर पालका अनुसार लुटपाट गर्न आएका डाँका समूहलाई प्रतिकार गर्न खोज्दा उनीहरूलाई छातीमा गोली लागेको हो ।

दुवै जनाको अवस्था गम्भीर भएकाले उपचारका लागि विराटनगरस्थित स्वास्थ्य संस्थामा लगिएको प्रहरीले जनाएको छ ।

मध्यराति आएको समूहले घरमै लुटपाट प्रयास गरेको र प्रतिरोध भएपछि गोली चलाएको प्रारम्भिक अनुसन्धानबाट खुलेको डीएसपी पालले बताए ।

घटना सम्बन्धमा थप अनुसन्धान भइरहेको प्रहरीले जनाएको छ ।