जनकपुरधाम, २ मंसिर । जिल्ला प्रशासन कार्यालय धनुषाले जेनजी युवा समूहको आह्वानमा भदौ २३ र २४ गते भएको आन्दोलनमा घाइते भएका व्यक्तिहरूलाई परिचयपत्र तथा भैपरी खर्च वितरण प्रक्रिया सुरु गर्ने भएको छ ।

गृह मन्त्रालयबाट प्राप्त नामावलीका आधारमा मन्त्रिपरिषद्को २०८२ भदौ १२ गतेको निर्णयअनुसार यो व्यवस्था कार्यान्वयनमा आउन लागेको हो ।

जिल्ला प्रशासन कार्यालय धनुषाले जारी गरेको सूचनामा धनुषामा स्थायी बसोबास गर्ने घाइतेहरूले आवश्यक कागजातसहित प्रशासन कार्यालयमा उपस्थित हुन आग्रह गरिएको छ ।

सरकारले उपलब्ध गराएको रकमका आधारमा तत्कालका लागि भैपरी खर्च वितरण गरिने प्रशासनले जनाएको छ ।

घाइतेले परिचयपत्र र भैपरी खर्च प्राप्त गर्न आन्दोलनका क्रममा उपचार गराएको अस्पतालको विरामी टिकट, डिस्चार्ज कागजात तथा खर्च बिल–भरपाई, नेपाली नागरिकताको प्रमाणपत्र (सक्कल), अटो–साइज फोटो दुईप्रति अनिवार्य रूपमा पेश गर्नुपर्नेछ ।

प्रशासनले घाइते व्यक्तिले स्वयम् आएर औँठाछाप दिनुपर्ने भएकाले व्यक्तिगत उपस्थित अनिवार्य गरिएको जनाएको छ ।