जनकपुरधाम, २ मंसिर । मधेश प्रदेशमा मुख्यमन्त्री कार्यालय तोडफोड प्रकरणमा संलग्न भन्दै मंगलबार पक्राउ परेका पूर्वसांसद परमेश्वर साह र लोकतान्त्रिक समाजवादी पार्टी (लोसपा) का नेता जिवेन्द्र झा धरौटीमा रिहा भएका छन् ।

अभद्र व्यवहार तथा तोडफोडसम्बन्धी आरोपमा पक्राउ परेका उनीहरूलाई प्रमुख जिल्ला अधिकारी प्रेमप्रसाद लुईंटेलले धरौटीमा छोड्ने आदेश दिएका हुन् ।

मंगलबार प्रहरीले उनीहरूलाई नियन्त्रणमा लिएपछि जिल्ला सरकारी वकिलको कार्यालयमार्फत प्रमुख जिल्ला अधिकारीसमक्ष अभियोजनका लागि पेश गरिएको थियो । सिडियो लुईंटेलले दुवै प्रतिवादीलाई धरौटीमा रिहा गर्ने निर्णय गरेपछि उनीहरू अदालत परिसरबाटै मुक्त भएका हुन् ।

नयाँ मुख्यमन्त्री नियुक्तिपछि उत्पन्न विवादका क्रममा कांग्रेससहित अन्य दलका नेताकर्मचारीहरूले प्रदेश सरकारको कार्यालय परिसरमा तोडफोड, कर्मचारी कुटपिट र राष्ट्रिय झण्डा हटाउनेसम्मका गतिविधि गरेका थिए । सोही क्रममा पूर्वसांसद साह र नेता झा प्रत्यक्ष संलग्न रहेको प्रहरीले जनाएको थियो ।

कर्मचारी कुटपिटको घटनापछि नेपाल निजामती कर्मचारी युनियनले जिल्ला प्रशासन कार्यालयमा ज्ञापनपत्र बुझाउँदै दोषीमाथि कडा कारबाहीको माग गरेको थियो । त्यसपछि प्रमुख जिल्ला अधिकारीले घटनामा संलग्नहरुको पहिचान गरी कानुनी प्रक्रिया अघि बढाउन प्रहरीलाई निर्देशन दिएका थिए ।

प्रहरीले आइतबार अदालतबाट पक्राउ पुर्जी लिएपछि मंगलबार बिहान उनीहरूलाई नियन्त्रणमा लिएको थियो । हाल घटनाका अन्य संलग्नबारे पनि प्रहरीले आवश्यक अनुसन्धान जारी राखेको जनाएको छ ।