जनकपुरधाम, २ मंसिर । मिथिलाको महान् धार्मिक एवम् सांस्कृतिक पर्व सीताराम विवाह पञ्चमी नजिकिँदै जाँदा जनकपुरधाम भव्य महोत्सवको माहोलले रंगिन थालेको छ ।

यही मंसिर ४ देखि १० गतेसम्म चल्ने सप्ताहव्यापी विवाह पञ्चमी महोत्सवका सबै तयारी तीव्र रुपमा अघि बढिरहेका छन् । जानकी मन्दिर परिसरदेखि शहरका प्रमुख मार्ग र रंगभूमि मैदानसम्म कामदारहरू निरन्तर व्यस्त देखिन्छन् ।

जनकपुरधामको पहिचान बनेको विवाह पञ्चमीलाई भव्य र व्यवस्थित बनाउन जानकी मन्दिर प्रशासनले दिनरात तयारी जारी राखेको छ । जानकी मन्दिरका उत्तराधिकारी रामरोशन दासका अनुसार मूलद्वार सजावट, पाल निर्माण, मञ्च निर्माण र रात्री कार्यक्रमका तयारी तीव्र गतिमा भइरहेको छ ।

‘हरेक साँझ जानकी मन्दिर परिसरमा मंगल गीत, झाँकी तथा सांस्कृतिक प्रस्तुति हुने तयारी हुँदैछ,’ महन्थ दासले भने । उनका अनुसार साधुसन्त, महन्थ र विशेष पाहुनाको स्वागतका लागि पण्डाल, स्वागतद्वार र सेवा केन्द्रहरूको निर्माण भइरहेको छ ।

विवाह पञ्चमीका लागि विभिन्न उपसमितिहरू गठन गरिएको छ जसले शान्ति–सुरक्षा, प्रचार–प्रसार, यातायात व्यवस्थापन, विद्युत् आपूर्ति, जन्ती स्वागत, बजार व्यवस्थापनदेखि आपतकालीन स्वास्थ्य सेवा व्यवस्थापनसम्म सम्हाल्दैछन् ।

यो महोत्सवमा लाखौँको भीड आउने अनुमानसँगै जनकपुरधाममा धार्मिक, सांस्कृतिक र पर्यटन गतिविधि एकसाथ बढ्ने महन्थ दासको विश्वास छ ।

महोत्सवका क्रममा आउने भीड र भक्तजनका कारण फोहोर व्यवस्थापन चुनौतीपूर्ण हुने भएकाले जानकी मन्दिर प्रशासनले उपमहानगरपालिकालाई विशेष ध्यान दिन आग्रह गरेको छ ।

‘विवाह पञ्चमीमा लाखौं मानिस आउँछन्, जताततै फोहोर बढ्छ । उपमहानगरपालिका र बृहत्तर जनकपुर क्षेत्र विकास परिषद्ले सक्रियता नदेखाउँदा समस्या बढ्ने गरेको छ,’ दासको गुनासो छ ।

उनले छोरीको बिहे ठानेर सबैले सरसफाइमा सहयोग गर्नुपर्ने आवश्यकता औंल्याउँदै तीनै तहको सरकार पनि सहयोगको अपेक्षा व्यक्त गरे । साथै उनले यस पर्वलाई राष्ट्रियकरण गर्नुपर्ने आवश्यकता रहेको भन्दै पर्वमा सार्वजनिक बिदा घोषणा गर्न सरकारसँग माग गरेका छन् ।

यता, जनकपुरधाम उपमहानगरपालिकाका प्रमुख मनोजकुमार साहका अनुसार यस वर्ष रंगभूमि मैदान (बाह्र बिघा) विवाह पञ्चमी केन्द्रित कार्यक्रम, प्रवासी भक्तजन बसाइ र सरसफाइ कार्यका लागि व्यवस्थित रूपमा तयार पारिँदैछ ।

उपमहानगरपालिकाले महोत्सव लक्षित विशेष सरसफाइ अभियान सञ्चालन गर्दै ट्र्याक्टर, पानी ट्यांकर, मोबाइल शौचालय, स्वास्थ्य शिविर र एम्बुलेन्स व्यवस्था बनाइरहेको छ । उनीहरूद्वारा बुधबार विहान व्यापक सरसफाइ अभियान समेत सञ्चालन गरिएको छ ।

बृहत्तर जनकपुर क्षेत्र विकास परिषद्ले पनि उपमहानगरपालिकाको ट्र्याक्टर तथा जनशक्तिको सहायताका साथ बाह्र बिघा क्षेत्रको फोहोर संकलन र व्यवस्थापनलाई तीव्रता दिएको अध्यक्ष शीतल साहले बताए ।

‘खानेपानी, बिजुली, सुरक्षा, शौचालय सबै सुविधा व्यवस्थित बनाउन हामी सतर्कताका साथ काम गरिरहेका छौँ,’ साहले भने ।

सप्ताहव्यापी महोत्सव अन्तर्गत जनकपुरधाममा मंसिर ४ गते जनकपुर नगर दर्शन, ५ गते फूलबारी लीला, ६ गते धनुष यज्ञ, ७ गते तिलकोत्सव, ८ गते मटकोर, ९ गते शुभविवाह र १० गते रामकलेवाको आयोजना गरिने छ ।

विवाह पञ्चमी नजिकिँदै जाँदा जनकपुरधाममा धार्मिक उत्साह बढ्दो छ । सडक, चौक, मन्दिर र बस्ती–बस्तीमा उत्सवको रौनक देखिन थालेको छ । व्यापारी, होटल व्यवसायी र स्थानीय बासिन्दाको चहलपहल पनि उल्लेख्य रूपमा बढेको छ ।

सीताराम विवाह पञ्चमी मिथिलाको पहिचान मात्र नभई सांस्कृतिक सम्पदाको सागर हो । यस वर्षको तयारीले जनकपुरधामलाई अझ भव्य, आकर्षक र व्यवस्थित महोत्सवका रूपमा प्रस्तुत गर्ने विश्वास छ ।