महोत्तरी, २ मंसिर । महोत्तरीको जलेश्वर नगरपालिका–९ आगेपुरमा ६० वर्षीय पुरुषको धारिलो हतियार प्रहार गरी हत्या गरिएको छ । सोमबार साँझ घर नजिकै हत्या भएका बेचन राइनको घटनाबारे प्रहरीले अनुसन्धान तीव्र पारेको जनाएको छ ।

जिल्ला प्रहरी कार्यालय महोत्तरीका अनुसार सोमबार साँझ करिब ७ बजेतिर राइनमाथि धारिलो हतियार प्रहार भएको सूचना आएपछि प्रहरी घटनास्थलतर्फ पुगेको थियो । प्रारम्भिक अनुसन्धानका आधारमा घटनामा संलग्न रहेको आशङ्कामा एक जना युवकलाई पक्राउ गरिएको प्रहरीले पुष्टि गरेको छ ।

पक्राउ पर्ने व्यक्ति जनकपुरधाम उपमहानगरपालिका–८ वेंगाशिवपुरका पप्पु भनिने अनिल मण्डल छन् । पक्राउ परेको बेलामा मण्डल लागुऔषध सेवनका कारण अचेतजस्तै अवस्थामा फेला परेपछि प्रहरीले नियन्त्रणमा लिएको जनाएको छ ।

महोत्तरी प्रहरीले मण्डललाई हिरासतमा राखेर घटनाको कारण, हतियारको प्रकृति र अन्य संलग्नता बारे थप अनुसन्धान भइरहेको जानकारी दिएको छ ।

स्थानीय बासिन्दा भने घटनापछि त्रसित बनेका छन् । प्रहरीले हत्यामा संलग्न अन्य व्यक्तिको सम्भावित संलग्नता नकार्न नसकिने भन्दै अनुसन्धान विस्तार गरिएको जनाएको छ ।