जनकपुरधाम, २ मंसिर । मधेश प्रदेशमा सरकार गठन विवाद चुलिँदै जाँदा अब मुख्यमन्त्री सरोजकुमार यादवका समर्थकहरू पनि सडकमा उत्रिएका छन् ।

सात दलीय गठबन्धनले लगत्तै नौ दिनदेखि धर्ना जारी राखिरहेको बेला मंगलबार एमाले नेता कार्यकर्ताहरू जनकपुरधामस्थित जनक चोकमा ‘मुख्यमन्त्रीलाई काम गर्न देऊ’ भन्ने मागसहित प्रतिवाद धर्ना थालेका हुन् ।

मुख्यमन्त्री यादवका समर्थक तथा एमालेका नेता कार्यकर्ताहरू ठूलो सङ्ख्यामा जनक चोकमा जम्मा भएर प्रदेश सरकारको काम रोक्ने जस्ता गतिविधि बन्द गर्न माग गरेका छन् । उनीहरूले विपक्षी सात दलले राजनीतिक स्वार्थका कारण सरकारी कामकाजमा अवरोध पुर्याइरहेको आरोप लगाएका छन् ।

एमाले महोत्तरीका अध्यक्ष बलिराम यादवले धर्नाका बीच सम्बोधन गर्दै भने, ‘संविधानको रक्षा गर्न पनि मुख्यमन्त्रीलाई निर्वाध रूपमा काम गर्न दिनुपर्छ । विपक्षी दलहरूले योजनाबद्धरुपमा विकास, सुशासन र सेवा प्रवाह रोकिरहेका छन् । त्यसको विरोधमा हामी सडकमा उत्रिएका हौँ ।’

मधेशमा सरकार गठन प्रक्रियालाई लिएर राजनीतिक तनाव बढेपछि सर्वोच्च अदालतमा दर्ता भएको रिटको सुनुवाइ जारी छ । काँग्रेस संसदीय दलका नेता कृष्णप्रसाद यादवसहित ७४ सांसदले यादव नेतृत्वको सरकार संवैधानिक नरहेको भन्दै रिट दर्ता गराएका थिए ।

सर्वोच्च अदालतले मुख्यमन्त्री यादवलाई दीर्घकालीन निर्णय नगर्न आदेश दिइसकेको छ । अदालतको अन्तिम निर्णय नआउँदासम्म सरकारलाई सावधानीपूर्वक अघि बढ्न निर्देशन दिइएको हो ।

मुख्यमन्त्री यादवका पक्षधरहरूले सात दलीय गठबन्धनले अदालतमा मुद्दा चलिरहेको संवेदनशील समयमा आन्दोलन र धर्ना सञ्चालन गरेर कामकै वातावरण बिगारिरहेको दाबी गरेका छन् ।

‘कानुनी प्रक्रियामै मुद्दा चलिरहँदा सडकमा हल्ला गरेर सरकारी कामलाई अवरुद्ध गर्नु गैरजिम्मेवारी हो,’ एक एमाले कार्यकर्ताले भने, ‘मुख्यमन्त्रीले काम गर्न पाउनु उनको अधिकार हो, जिम्मेवारी पनि हो । त्यसलाई विपक्षी दलहरूले रोकिरहेका छन् ।’

एकातिर विपक्षी गठबन्धनको धर्ना मधेश भवनसम्म धकेलिँदै छ भने अर्कोतिर एमाले समर्थकहरूको प्रतिवाद नाराले जनकपुरधामको राजनीतिक वातावरण झनै तातिएको छ ।

दुवैतिरको शक्ति प्रदर्शनले प्रशासनिक कामकाज प्रभावित बनेको छ भने सर्वसाधारण पनि दिनहुँजसो राजनैतिक भिडन्तका बीचमा पर्दै आएका छन् ।

सर्वोच्च अदालतले छिट्टै फैसला सुनाउने अपेक्षा गरिएको छ । अदालतको आदेशले प्रदेश सरकारको भविष्य, राजनीतिक समीकरण र आन्दोलनको स्वरूप सबैलाई प्रत्यक्ष प्रभावित गर्नेछ ।

यसैबीच, सडकमा जारी प्रतिरक्षा र प्रतिवाद दुवै आन्दोलनले मधेश राजनीति अहिले संवेदनशील मोडमा पुगेको संकेत गरिरहेको छ ।