रौतहट, ३० कार्तिक । रौतहटको गौरमा सात दलिय गठबन्धनले मधेश प्रदेशमा पूर्ण स्वायत्तता कायम गर्न र संघीय हस्तक्षेप रोक्न माग गर्दै विरोध प्रदर्शन गरेको छ ।

प्रदर्शनकारीहरूले प्रदेशका सबै स्थानीय प्रशासनिक, सुरक्षा र विकास सम्बन्धी अधिकार प्रदेश मातहत रहनुपर्ने माग राखेका छन् ।

प्रदर्शनकारीहरूले प्रदेशलाई पूर्ण तीन स्वायत्त प्रदेशको रूपमा घोषणा गर्नुपर्ने, प्रहरी र कर्मचारी पूर्ण रूपमा प्रदेशको मातहत कायम रहनुपर्ने, संघको ऋण र अन्य हस्तक्षेप तत्काल फिर्ता गर्नुपर्ने लगायतका नारा लगाएका थिए । उनीहरूले संघीय हस्तक्षेपले प्रदेशको अधिकारमा कुनै प्रकारको खटपट वा दमन हुने कुरा स्वीकार्य नभएको स्पष्ट पारे ।

साथै प्रदर्शनमा स्थानीय तहलाई पूर्णरूपमा प्रदेश मातहत राख्न, शिक्षा, स्वास्थ्य, कृषि, उद्योग र अन्य स्रोतहरूको स्वायत्तता सुनिश्चित गर्नुपर्ने माग पनि उठाइएको थियो । सहभागी नेताहरूले मधेश प्रदेशको आर्थिक र सामाजिक विकास प्रदेशकै निर्णयमा आधारित हुनुपर्ने पक्षमा जोड दिए ।

गठबन्धनका नेताहरूले भने, ‘प्रदेशको हक, अधिकार र स्रोतमा संघीय हस्तक्षेप अस्वीकार्य छ । स्थानीय प्रशासन, शिक्षा, स्वास्थ्य र कृषि जस्ता आधारभूत सेवा प्रदान गर्ने अधिकार प्रदेशको मातहत रहनुपर्छ ।’

प्रदर्शन शान्तिपूर्ण रूपमा सम्पन्न भए पनि सहभागीहरूले आगामी दिनमा प्रदेश अधिकार सुनिश्चित गर्न थप आन्दोलनको चेतावनी दिएका छन् ।