जनकपुरधाम, ३० कार्तिक । धनुषाको मिथिला बिहारी नगरपालिका–२ जनमुक्ति चोकस्थित कल्चर भिलेजमा तेस्रो संस्करणको सर्प महोत्सव सुरु भएको छ ।

मिथिला वाइल्ड लाइफ ट्रष्ट र सेभ द लाइभ्सको संयुक्त आयोजनामा आयोजना गरिएको यो महोत्सव मंसिर १ गतेसम्म चल्नेछ ।

‘सर्पको महत्व बुझौं, सहअस्तित्वलाई सम्मान गरौँ, संरक्षणमार्फत भविष्य सुरक्षित गरौँ’ भन्ने मूल नारासहित सुरु भएको महोत्सवले सर्प र मानवबीचको सहअस्तित्व, जैविक विविधता संरक्षण, र पर्यावरणीय सन्तुलनमा सर्पको भूमिकामा केन्द्रित छ ।

आयोजक संस्थाका अध्यक्ष देवनारायण मण्डलले सर्पको महत्वबारे नागरिकमा चेतना फैलाउने उद्देश्यले महोत्सव आयोजना गरिएको बताए ।

उनले भने, ‘सर्प अझै पनि अन्धविश्वास र डरको प्रतीकका रूपमा हेरिन्छ । तर, यो वातावरण सन्तुलन कायम राख्ने अभिन्न जीव हो, केवल डस्ने मात्र होइन ।’

महोत्सवमा सर्पको जीवनचक्र, विषका प्रकार, सर्पदंशपछिको उपचार प्रक्रिया र उद्धारसम्बन्धी व्यावहारिक जानकारी दिने व्यवस्था गरिएको छ । साथै, सर्प संरक्षणसम्बन्धी चित्र प्रदर्शनी र जीवित सर्प प्रदर्शनीमार्फत सहभागीहरूलाई प्रत्यक्ष अवलोकन र सिकाइको अवसर प्रदान गरिएको छ ।

अध्यक्ष मण्डलले महोत्सवको उद्देश्यबारे थप जानकारी दिँदै भने, ‘सर्प र मानवबीच द्वन्द्व न्यूनिकरण गर्दै यसको पर्यावरणीय, चिकित्सकीय, धार्मिक तथा सांस्कृतिक महत्व उजागर गर्नु महोत्सवको मुख्य लक्ष्य हो ।’

स्थानिय नागरिक र पर्यावरणविद्हरूले यस महोत्सवलाई सराहना गर्दै सर्प संरक्षण र जैविक विविधता संरक्षणमा जनचेतना फैलाउने माध्यमको रूपमा महत्त्वपूर्ण ठहर गरेका छन् ।