जनकपुरधाम, ३० कार्तिक । मधेश प्रदेशसभाबाट नियमित १० बैठकमा अनुपस्थित भएको भन्दै पदमुक्त गरिएका पाँच सांसदहरूले आइतबार सर्वोच्च अदालतमा रिट निवेदन दायर गरेका छन् ।

सांसद उर्मिला देवी सिंह, मनिषकुमार सुमन, सञ्जयकुमार यादव, सिंहासन सा कलवार र शारदाशंकर प्रसाद कलवारको पद कार्तिक २७ गतेदेखि रिक्त भएको सूचना प्रदेश सभाले प्रकाशित गरेको थियो ।

सांसदहरूले पदमुक्त गर्ने प्रदेश सभाका सभामुख रामचन्द्र मण्डलको निर्णयविरुद्ध रिट दायर गर्दै आफ्नो पद पुनः बहाल गर्न माग गरेका हुन् । सर्वोच्च अदालतले रिट निवेदन दर्ता हुने प्रक्रियामा राखेको छ ।

सर्वोच्चले यस रिटमा प्रारम्भिक सुनुवाइ गरेर आगामी कदम तय गर्नेछ ।