जनकपुरधाम, ३० कार्तिक । मधेश प्रदेशमा एमाले नेता सरोजकुमार यादवलाई मुख्यमन्त्री नियुक्त गरी शपथ गराइएको विवादले राजनीतिक अस्थिरता चुलिँदै गएको छ ।

मुख्यमन्त्री नियुक्ति प्रक्रिया विवादास्पद रहेको र अस्वभाविक ढंगले शपथ गराइएको भन्दै नेपाली कांग्रेस, जसपा, लोसपा लगायतका दलका प्रदेश सभासदहरूले विरोध प्रदर्शन गरिरहेका छन् ।

शनिबार निवर्तमान मुख्यमन्त्री जितेन्द्र सोनलसहित ७ पार्टीका नेताहरू सडकमा उत्रेर विरोध जनाए । उनीहरूले मुख्यमन्त्री यादवको नेतृत्व अस्वीकृत गर्दै तत्काल माफी माग्नुपर्ने र द्वन्द्व सिर्जना गर्ने अभिव्यक्तिबाट दूरी राख्नुपर्नेमा जोड दिएका छन् ।

मुख्यमन्त्री यादवले मधेशबासीको नाममा सम्बोधन गर्दै छिमेकी देशप्रति लक्षित, गैर कूटनीतिक अभिव्यक्ति दिएका थिए । उनले वीरगञ्जस्थित काउन्सिलर अफिसको प्रतिनिधिहरूले दलहरूसँग प्रत्यक्ष संवाद गरेर थ्रेट गर्ने, दलहरू फोड्ने र जुटाउने कार्य गरेको बताउँदै राजनीतिक अस्थिरताको आरोप लगाए । यादवले सुरक्षा चुनौती रहेको दाबी गर्दै आफू सुरक्षित नभए अरू कसैलाई सुरक्षित राख्न सकिँदैन भन्ने बयान दिएका छन् ।

मधेश केन्द्रित एक नेताका अनुसार मुख्यमन्त्री यादवको अभिव्यक्ति छिमेकी भारतसँग द्वेष फैलाउने खालको रहेको छ । यसले प्रदेशको राजनीतिक वातावरणमा नकारात्मक प्रभाव पार्ने र दुई देशको सम्बन्धमा तनाव सिर्जना गर्ने सम्भावना देखाएको छ । निवर्तमान मुख्यमन्त्री सोनलले पनि यादवले दिएको भ्रामक र तथ्यहीन अभिव्यक्तिले मधेशका ८ जिल्लामा असर पार्ने भन्दै माफी माग्न आग्रह गरेका छन् ।

कार्तिक २४ गते बिहान झिसमिसे शैलीमा यादवलाई मुख्यमन्त्रीको शपथ गराइएपछि मधेशमा अस्थिरताको नयाँ चक्र सुरु भएको थियो ।विवादपछि प्रदेश प्रमुख सुमित्रा सुवेदी भण्डारीलाई हटाएर नयाँ प्रदेश प्रमुख डा. सुरेन्द्र लाभ कर्ण नियुक्त भए पनि राजनीति स्थिर हुन सकेको छैन । विवाद बढ्दै जाँदा उपसभामुख बबिरा राउत ईशरले चौरमा प्रदेश सभाको बैठक राख्नुपर्ने अवस्था सृजना भयो ।

सर्वोच्चमा यादवको नियुक्तिविरुद्ध रिट चलिरहेको छ । अदालतले अन्तरिम आदेश जारी गरेको छ । यसले तत्कालीन राजनीतिक निर्णयलाई रोक्ने काम गरेको छ । एमालेसँग सत्ता सहकार्य गरिरहेको कांग्रेस मधेशमा मुख्यमन्त्रीको विरोधमा रहँदा अल्पमतमा रहेका यादवले सुरक्षा निकायलाई स्थिति नियन्त्रणका लागि निर्देशन दिए पनि परिस्थिति अझ पेचिलो बन्दै गएको छ ।

जनकपुरधाममा भएको प्रदेश सुरक्षा समन्वय समितिको बैठकमा यादवले राजनीतिक उग्रता र बदमासी रोक्न गम्भीर हुनुपर्ने बताए । तर, सुरक्षा निकायले राजनीतिक अस्थिरता झन् बढिरहेको रिपोर्ट गरेका छन् ।

राजनीतिक अस्थिरता लम्बिँदै जाँदा मधेशका युवाहरूले प्रदेशसभा विघटन गरी प्रदेश प्रमुख शासन लागू गर्न माग गरेका छन् । यस्तै, काठमाडौं फर्केका कांग्रेस सभापति शेरबहादुर देउवाले मधेशको घटनाक्रमबारे चासो व्यक्त गर्दै नेताहरूसँग छलफल गरेका छन् ।

मधेशको राजनीतिक अवस्था अझ पेचिलो बन्दै गएको र आगामी दिनमा प्रदेश सरकारको स्थायित्व र सुरक्षा व्यवस्थामा चुनौती रहने देखिएको छ ।