जनकपुरधाम, ३० कार्तिक । मिथिलाको सांस्कृतिक र धार्मिक पर्व रामजानकी विवाह पञ्चमी महामहोत्सवलाई सुरक्षित र मर्यादित रूपमा मनाउन जिल्ला प्रशासन कार्यालय धनुषाले विशेष सूचना जारी गरेको छ ।

जिल्ला प्रशासन कार्यालय धनुषाले जारी गरेको सूचनाअनुसार मंसिर ७ गते राति १२ बजेदेखि मंसिर १० गते राति १२ बजेसम्म जनकपुरधाम उपमहानगरपालिका क्षेत्रभित्र र परिक्रमा सडकको दायाँ–बायाँ क्षेत्रमा मदिरा बिक्री–वितरण, पशुपंक्षी मारकाट, माछा र मासु बिक्री–वितरण, उत्पादन तथा अन्य नसालु पदार्थको सेवन पूर्णरूपमा निषेध गरिएको छ ।

सहायक प्रमुख जिल्ला अधिकारी उमेश कुमार दहालका अनुसार यस सूचना विपरित उल्लंघन भएमा प्रचलित कानुनअनुसार कारवाही गरिने जनाइएको छ ।

प्रशासनले पर्वलाई सौहार्दपूर्ण वातावरणमा मनाउने उद्देश्यसहित स्थानीय व्यवसायी, सर्वसाधारण र सरोकारवालालाई सूचनाको पालना गर्न आग्रह गरेको छ ।