जनकपुरधाम, ३० कार्तिक । मधेश प्रदेशमा लगातार बने–बिग्रेका सत्ता समीकरण, राजनीतिक किचलो, बेथिति र भ्रष्टाचारप्रति रोष व्यक्त गर्दै जनकपुरधामका युवाहरूले प्रदेशसभा विघटन र प्रदेश प्रमुख शासन लागू गर्न माग गरेका छन् ।

आइतबार उनीहरूले एक समूह बनाएर प्रदेश प्रमुख डा. सुरेन्द्र लाभ कर्णलाई ज्ञापनपत्र बुझाउँदै मधेशलाई राजनीतिक संकटबाट निकाल्न ‘प्रदेश प्रमुख शासन नै उपयुक्त विकल्प’ भएको दाबी गरेका हुन् ।

ज्ञापनपत्र बुझाउन आएका युवाहरूले मधेशमा पछिल्लो समय देखिएको राजनीतिक अराजकता, सत्ताको निरन्तर छिनाछप्टी, भ्रष्टाचार र प्रशासनिक कमजोरीका कारण सर्वसाधारण निराश भएको बताएका छन् ।

उनीहरूका अनुसार, ‘सरकार बनाउने–ढाल्ने खेलले मधेशको राजनीतिक छवि मात्रै नभई मधेसी जनताको पहिचानसम्म बदनाम भएको छ ।’

तत्कालीन मुख्यमन्त्री जितेन्द्र सोनलले विश्वासको मत नपाएपछि दिएको राजीनामा र त्यसपछि देखा परेको सत्ता संकटले प्रदेशलाई दिनदिनै थप अस्थिर बनाइरहेको उनीहरूको आरोप छ ।

युवाहरूले मधेश प्रदेशमा विगत केही हप्तादेखि देखिएको राजनीतिक तानातान, सात दलको विरोध प्रदर्शन, मुख्यमन्त्री नियुक्ति र त्यसविरुद्ध सर्वोच्चमा परेको रिटलगायत घटनालाई संघीयताप्रतिको जनविश्वास डगमगिएको संकेतका रूपमा व्याख्या गरेका छन् ।

युवा अगुवा सरोज मिश्रले भने, ‘संघीयतालाई सुदृढ गर्ने उद्देश्यले बनेको प्रदेश सभा अहिले दलगत स्वार्थको थलो मात्र बनेको छ । यस्तो अवस्थामा नयाँ जनादेश बिना स्थिरता सम्भव छैन ।’

ज्ञापनपत्रमा युवाहरूले प्रदेशसभालाई तत्काल विघटन गरी प्रदेश प्रमुखको नेतृत्वमा नागरिक सरकार घोषणासहित नयाँ निर्वाचनमा जानुपर्ने माग राखेका छन् ।

युवाहरूले बुझाएको ज्ञापनपत्र ग्रहण गर्दै प्रदेश प्रमुख डा. कर्णले मधेशमा अहिले देखिएको राजनीतिक संवेदनशीलता बुझ्नुपर्ने बताउँदै संविधानबमोजिम उपलब्ध विकल्पहरूबारे अध्ययन गर्ने बताएका छन् ।