जनकपुरधाम, ३० कार्तिक । मधेश प्रदेशका मुख्यमन्त्री सरोजकुमार यादवको नियुक्ति र बर्दिबासको होटलमा गराइएको शपथविरुद्ध दायर रिटमाथि आइतबार हुने भनिएको सर्वोच्च अदालतको सुनुवाइ स्थगित भएको छ ।

निर्धारित समयअनुसार आज हुने भनिएको सुनुवाइ सारिँदै भोलि सोमबारका लागि पुनः तोकिएको सर्वोच्च अदालतले जनाएको छ ।

मुख्यमन्त्री नियुक्ति विवादसँग सम्बन्धित अन्तरिम आदेशबारे छलफल गर्न आज न्यायाधीश तिलप्रसाद श्रेष्ठ र न्यायाधीश नृपध्वज निरौलाको संयुक्त इजलासमा सुनुवाइ हुने तालिका थियो । तर, प्रक्रियागत कारण देखाउँदै इजलासले सुनुवाइ भोलिसम्मका लागि सारिदिएको हो ।

तत्कालीन मुख्यमन्त्री जितेन्द्रप्रसाद सोनल विश्वासको मत लिन विफल भएपछि तत्कालिन प्रदेश प्रमुख सुमित्रा सुवेदी भण्डारीले संविधानको धारा १६८(३) बमोजिम नेकपा एमालेका संसदीय दलका नेता सरोजकुमार यादवलाई मुख्यमन्त्री नियुक्त गरेकी थिइन् ।

तर, उनले शपथ ग्रहण जनकपुरधाम वा प्रदेश प्रमुखको कार्यालयमा गराउनुभन्दा महोत्तरी र सिन्धुलीको सिमानामा पर्ने बर्दिबास नगरपालिका–३ कालापानीस्थित पानस होटलमा पुगेर गराएको विषयले तत्काल व्यापक विवाद निम्त्यायो ।

यही प्रक्रियालाई असंवैधानिक भन्दै मधेश प्रदेशका ७४ जना सांसदले सर्वोच्च अदालतमा रिट दर्ता गरेका हुन् । रिटमा मुख्यमन्त्री नियुक्ति प्रक्रियाको वैधता, शपथ स्थलको संवैधानिक आधार र प्रदेश प्रमुखको अधिकार सीमाबारे प्रश्न उठाइएको छ ।

मधेश प्रदेशमा पछिल्लो केही महिनादेखि देखिएको राजनीतिक अस्थिरताबीच एमाले नेतृत्वमा गठन भएको नयाँ सरकारले समेत काम गर्ने वातावरण पाउन संघर्ष गरिरहेको छ । सात दलको विरोध, लगातारको धर्ना र सर्वोच्चको कानुनी प्रक्रियाले प्रदेशको सत्ता समीकरण अनिश्चित बनेको छ ।

अब भोलि हुने सुनुवाइले मधेश सरकारको वैधानिकता, स्थायित्व र आगामी राजनीतिक दिशामा ठूलो प्रभाव पार्ने देखिएको छ ।