जनकपुरधाम, २९ कार्तिक । मधेश प्रदेशमा जारी विभिन्न आन्दोलन, त्यसबाट बढेको सुरक्षा चुनौती र आगामी फागुन २१ गते हुने प्रतिनिधि सभा निर्वाचनलाई लक्षित गर्दै प्रदेश सुरक्षा समन्वय समितिको उच्चस्तरीय बैठक शनिबार सम्पन्न भएको छ ।

गृह, सञ्चार तथा कानून मन्त्रालयको जिम्मेवारी समेत सम्हालिरहेका मुख्यमन्त्री सरोजकुमार यादवको अध्यक्षतामा गृह मन्त्रालयमा बसेको बैठकमा प्रदेशको समग्र शान्ति–सुरक्षा परिस्थितिबारे विस्तृत समीक्षा गरिएको हो ।

बैठकमा हाल प्रदेशका विभिन्न क्षेत्रमा जारी आन्दोलन, प्रदर्शन तथा त्यस क्रममा उत्पन्न विवाद, कर्मचारी र सुरक्षाकर्मीमाथि भएका हातपातका घटनासहितका विषयमा गम्भीर छलफल भएको मधेश प्रदेशका निमित्त प्रमुख सचिव लालबाबु कवाडीले जानकारी दिए । साथै, आन्दोलनको प्रभाव जनजीवनमा मात्र नभई आगामी निर्वाचन सुरक्षामाथि समेत पर्न सक्ने जोखिमबारे सुरक्षा निकायले आ–आफ्ना मूल्यांकन प्रस्तुत गरेको थियो ।

बैठकमा प्रदेशमा रहेका अतिविशिष्ट तथा विशिष्ट पदाधिकारीहरूको सुरक्षा थप सुदृढ बनाउने, संवेदनशील क्षेत्र पहिचान गरी जोखिम न्यूनीकरण गर्ने र आम नागरिकको दैनन्दिन सुरक्षामा कुनै खलल नपरोस् भन्ने उद्देश्यसहित संयुक्त रणनीति बनाउन छलफल गरिएको थियो । यस क्रममा सुरक्षा निकायहरूलाई प्रदेश सरकारले उपलब्ध गराउनुपर्ने सहयोग, उपकरण, जनशक्ति र सहकार्य संयन्त्रबारे पनि समीक्षा गरिएको बताइएको छ ।

कार्तिक २८ गते धनुषाको मिथिला बिहारी नगरपालिकामा वडाध्यक्ष विन्देश्वर यादवको हत्या प्रकरणबारे धनुषाका प्रमुख जिल्ला अधिकारी प्रेमप्रसाद लुइँटेलले बैठकमा विस्तृत जानकारी प्रस्तुत गरेका थिए । उक्त घटनाले प्रदेशको सुरक्षा वातावरणमा देखाएको संवेदनशीलतालाई ध्यानमा राख्दै घटनाको छिनछिनको अपडेट र अनुसन्धानबारे जानकारी साझा गरिएको जनाइएको छ ।

बैठकपछि पत्रकारहरूसँग कुरा गर्दै मुख्यमन्त्री यादवले मधेश प्रदेशमा शान्ति–सुरक्षा कायम राख्न सुरक्षा निकायका प्रमुखहरू पूर्ण रूपमा प्रतिबद्ध रहेको बताए । ‘प्रदेश सरकार सुरक्षा सुदृढीकरणको गार्जियनको रूपमा उभिन तयार छ । भौतिक, आर्थिक तथा नैतिक सबै प्रकारको सहयोग प्रदेश सरकारका तर्फबाट उपलब्ध गराइनेछ,’ उनले भने ।

मुख्यमन्त्री यादवका अनुसार निर्वाचन नजिकिँदै जाँदा थप सुरक्षा संवेदनशीलता बढ्ने भएकाले सुरक्षा संयोजनलाई अधिक संगठित र प्रभावकारी बनाइने तयारी गरिएको छ । उनले सुरक्षा निकायलाई तालमेल, तदारुकता र छलफलका आधारमा प्रदेशमा शान्ति–व्यवस्था दृढ राख्न निर्देशन दिए ।

प्रदेश सुरक्षा समन्वय समितिको बैठकमा मधेश प्रदेशका प्रहरी नायव महानिरीक्षक, सशस्त्र प्रहरी बलका नायव महानिरीक्षक, राष्ट्रिय अनुसन्धान विभागका प्रदेश प्रमुख, नेपाली सेनाका प्रदेश प्रमुखलगायत धनुषाका प्रमुख जिल्ला अधिकारी प्रेमप्रसाद लुइँटेलसहितका उच्चस्तरीय अधिकारीहरूको उपस्थिति थियो ।

बैठकले मधेश प्रदेशमा शान्ति–सुरक्षा प्रणालीलाई अझ व्यवस्थित, सुदृढ र समन्वित बनाउने दिशामा महत्वपूर्ण छलफल गरेको बताइएको छ ।