जनकपुरधाम, २९ कार्तिक । मधेश प्रदेशका मुख्यमन्त्री सरोजकुमार यादवले भारतीय दूतावासका प्रतिनिधिहरूले प्रदेशका राजनीतिक दलहरूलाई धम्क्याउने गरेको आरोप लगाएका छन् ।

शनिबार प्रदेशवासीको नाममा जारी गरेको विशेष सम्बोधनमा उनले वीरगंजस्थित भारतीय दूतावासको काउन्सलर कार्यालयबाट निरन्तर रूपमा दबाब र धम्की आउने गरेको उल्लेख गर्दै प्रदेशको राजनीतिक अस्थिरतामागर्दै आएको कारण त्यही हस्तक्षेप भएको दाबी गरे ।

मुख्यमन्त्री यादवका अनुसार काउन्सलर कार्यालयका प्रतिनिधिहरूले दलका शीर्ष नेताहरूसँग प्रत्यक्ष संवाद नगरी परोक्ष रूपमा ‘दल फुटाइदिन्छु’ भनी धम्की दिने, राजनीतिक निर्णयमा दबाब सिर्जना गर्ने तथा प्रदेशको आन्तरिक राजनीतिमा हस्तक्षेप गर्ने गतिविधि गर्दै आएका छन् । ‘मधेशमा राजनीतिक अस्थिरताको मूल जड यिनै धम्की र बाह्य चलखेल हो,’ उनले भने ।

सम्बोधनको क्रममा उनले आफूलाई गम्भीर सुरक्षा खतरा रहेको भन्दै सुरक्षा निकायले अत्यन्तै सावधानी अपनाउन सुझाव दिएको खुलासा गरे । ‘मुख्यमन्त्रीज्यू विशेष कार्यक्रमहरू कम गर्नुपर्छ, संवेदनशील हुनुपर्छ भन्ने निर्देशन सुरक्षा निकायबाटै आएको छ,’ उनले भने ।

यादवका अनुसार सुरक्षा चुनौती मुख्यमन्त्रीमा मात्र सीमित नभई सरकारका अन्य मन्त्री, प्रदेशसभा सदस्य तथा एमालेसँग आबद्ध नेताहरू पनि सुरक्षाको जोखिममा रहेको बताए । उनले यो परिस्थिति प्रदेशको राजनीतिक अस्थिरतासँग प्रत्यक्ष सम्बन्धित रहेको उल्लेख गरे ।

प्रदेशवासीलाई सम्बोधन गर्दै मुख्यमन्त्री यादवले नेकपा एमाले नै मधेशको ‘सच्चा राजनीतिक दल’ भएको पुनः दाबी गरे । अन्य दलहरूले मधेशवादीको नाममा नाटक मात्र गर्ने गरेको आरोप लगाउँदै उनले २०७९ को स्थानीय तथा प्रदेश निर्वाचनले एमालेलाई मधेशको प्रभावशाली शक्ति भएको प्रमाणित गरिसकेको बताए ।

गत केही हप्तादेखि मधेश प्रदेशमा सत्ता समीकरण फेरिएलगत्तै मुख्यमन्त्री यादवले भारतमाथि हस्तक्षेपको आरोप लगाएका हुन् । उनले भने, ‘मधेश प्रदेशमा भइरहेका धेरै राजनीतिक खेलहरू भारतले गराएको छ । यहाँको राजनीतिक स्थिरतामा बाह्य हस्तक्षेप गम्भीर समस्या बनेको छ ।’