जनकपुरधाम, २९ कार्तिक । नेकपा एमालेले प्रतिनिधिसभा पुनःस्थापनाको मागसहित देशभरि सञ्चालन गर्ने भनिएको जनसभा श्रृङ्खला धनुषामा रोकिएको छ ।

मिथिला बिहारी नगरपालिका–९ का वडाध्यक्ष विन्देश्वर यादवको हत्या भएपछि पार्टीको धनुषा जिल्ला कमिटीले शनिबारका लागि तय गरिएको जनसभा कार्यक्रम स्थगित गरेको हो ।

एमाले धनुषाका सचिव दिपन ठाकुरका अनुसार प्रतिनिधिसभा पुनःस्थापनाका लागि ७७ वटै जिल्लामा एकै दिन जनसभा आयोजना गर्ने केन्द्रीय निर्णयअनुसार धनुषामा समेत तयारी पूरा भएको थियो। तर पार्टीका स्थानीय नेता तथा वडाध्यक्ष यादवको गोली प्रहारबाट मृत्यु भएपछि कार्यक्रम रोक्नु परेको उनले बताए । ‘वडाध्यक्ष यादव हाम्रो सक्रिय जनप्रतिनिधि भएकाले शोक प्रकट गर्दै धनुषाको कार्यक्रम स्थगित गरिएको हो,’ ठाकुरले भने ।

२०७९ सालको स्थानीय तह निर्वाचनमा स्वतन्त्र उम्मेदवारका रूपमा विजयी भएका यादव पछि एमालेमा प्रवेश गर्दै पार्टी संगठनमा सक्रिय बनेका थिए । शुक्रबार मिथिला बिहारी–९ को अन्दुपट्टीस्थित मृत्यु संस्कारमा पुगेका यादवसहितको समूह र स्थानीय अर्को समूहबीच विवाद चर्किँदा झडप भएको थियो । झडपकै क्रममा चलाइएको गोलीले वडाध्यक्ष यादव गम्भीर घाइते भए र उपचारका क्रममा उनको मृत्यु भयो । सो घटनामा थप तीन जना घाइते भएका छन् ।

उता, प्रहरीले घटनामा संलग्न रहेकाहरूको खोजी तीव्र पारेको जनाइएको छ । प्रारम्भिक अनुसन्धानका क्रममा दुईजनालाई नियन्त्रणमा लिइएको सुरक्षा निकायले जनाएको छ भने अन्य सम्भावित संलग्न व्यक्तिहरूको पहिचान र प्रमाण संकलनको काम भइरहेको छ ।

वडाध्यक्षको हत्या घटनाले धनुषासहित मधेश प्रदेशमा राजनीतिक तथा सुरक्षा वातावरण फेरि तनाबपूर्ण बनेको छ । प्रतिनिधिसभा पुनःस्थापनाका लागि देशव्यापी अभियान सुरु गरेको एमालेले अन्य जिल्लामा भने कार्यक्रम तय गरिएको तालिकाअनुसारै सञ्चालन भइरहेको जनाएको छ ।