बारा, २९ कार्तिक । बाराको जीतपुर सिमरा उपमहानगरपालिका–५ स्थित लल्का पुलनजिकैबाट करिब ४४ ग्राम ४०० मिलिग्राम खैरो ब्राउन सुगरसहित दुई महिला पक्राउ परेका छन् ।

विशेष सूचनाका आधारमा शनिबार दिउँसो ३ः४० बजे इलाका प्रहरी कार्यालय सिमरा बारा तथा लागुऔषध नियन्त्रण ब्युरो शाखा कार्यालय वीरगञ्ज पर्साबाट खटिएको संयुक्त प्रहरी टोलीले दुवै जनालाई नियन्त्रणमा लिएको हो ।

पथलैयातर्फ पैदल आइरहेका ती दुई महिलालाई शंकास्पद देखिएपछि रोकेर जाँच गर्ने क्रममा एकको साथबाट ७ पुरियामा राखिएको करिब ४४ ग्राम ४०० मिलिग्राम लागूऔषध ब्राउन सुगर फेला परेको प्रहरीले जनाएको छ ।

पक्राउ पर्नेमा पर्साको पटेर्वा सुगौली गाउँपालिका–६ निवासी प्रभु मुखियाकी अन्दाजी ३५ वर्षीया श्रीमती सुशीला देवी र सोही कार्यमा संलग्न पर्साको पोखरिया नगरपालिका–७ निवासी अजय मुखियाकी अन्दाजी ३० वर्षीया श्रीमती पूजा देवी रहेका छन् ।

दुवै जनालाई नियन्त्रणमा लिएर आवश्यक थप अनुसन्धानसहित कानुनी प्रक्रिया अघि बढाइएको प्रहरीले जानकारी दिएको छ ।