जनकपुरधाम, २९ कार्तिक । मधेश प्रदेशमा चुलिएको सत्ता–विवाद बीच प्रदेश प्रमुख डा. सुरेन्द्र लाभ कर्णले शनिबार दिउँसो ३ बजे आह्वान गरेको सर्वदलीय बैठक सात दलीय गठबन्धनले बहिष्कार गरेको छ ।

वर्तमान राजनीतिक जटिलता समाधान गर्न भन्दै प्रदेश प्रमुखले दलहरूलाई एकै स्थानमा बसाल्ने प्रयास गरे पनि सात दलले बैठक अस्वीकार गरेका छन् ।

बैठकमा नेकपा एमालेका संसदीय दलका नेता तथा वर्तमान मुख्यमन्त्री सरोजकुमार यादव सहभागी हुने व्यवस्था मिलाइएकाले सर्वदलीय बैठकको उद्देश्य नै निष्पक्ष नरहने गठबन्धन दलहरूको दाबी छ । त्यसैले बैठकमा उपस्थित नहुने निर्णय गरिएको उनीहरू बताउँछन् ।

सात दलका नेताहरूले सरकार गठन प्रक्रियादेखि सभामुखको विवादासम्मका विषयमा अवस्था असामान्य रहेकोले प्रदेश प्रमुखले विवादकै केन्द्रमा रहेका व्यक्तिलाई बैठकमै सहभागी गराएर समाधान खोज्ने प्रयास विश्वसनीय नदेखिएको बताएका छन् ।