जनकपुरधाम, २७ कार्तिक । मधेश प्रदेशकी उपसभामुख बबिताकुमारी राउत ईशरले सुरक्षाको कारण देखाउँदै जनकपुरधामस्थित प्रदेशसभा भवनभित्रको आवास खाली गरेकी छन् ।

हालै प्रदेशसभामा उत्पन्न तनाव र सभामुखविरुद्धको पदअनुकूल आचरण नगरेको प्रस्तावपछिको राजनीतिक वातावरण असहज बनेको भन्दै उनले व्यक्तिगत सुरक्षाका लागि सो कदम उठाएको बताइन् ।

उपसभामुख राउतले भनिन्, ‘हाल प्रदेशसभामा राजनीतिक तनाव तीव्र भएको छ । कार्यकक्षमै सांसदहरूलाई थुनिएको, विवाद भएको, हातपातको प्रयास भएको घटनाले मलाई पनि असुरक्षित महसुस गराएको छ । त्यसैले सुरक्षा निकायको सुझावअनुसार प्रदेशसभा भवनभित्रको आवास छोडेकी हुँ ।’

उनका अनुसार उनले अस्थायी रूपमा जनकपुरधामकै निजी वासस्थानमा बसोबास गर्ने निर्णय गरेकी छन् । उनले प्रदेशसभामा जिम्मेवारी निर्वाहमा कुनै असर नपर्ने र आफ्नो कार्यालयको काम नियमित रूपमा सञ्चालन हुने बताइन् ।

प्रदेशसभामा हाल सभामुख रामचन्द्र मण्डलविरुद्ध पदअनुकूल आचरण नगरेको प्रस्ताव दर्ता भएपछि सत्ता र प्रतिपक्षबीच तीव्र विवाद भइरहेको छ । सोहीबीच केही सांसदहरू उपसभामुखको कार्यकक्षमै थुनिएको घटनापछि राजनीतिक वातावरण थप तातिएको थियो ।