जनकपुरधाम, २७ कार्तिक । जनकपुरधाम उपमहानगरपालिका–७ स्थित रामजानकी माध्यमिक विद्यालयमा विद्यार्थी, शिक्षक र अभिभावकबीचको समन्वय मजबुत पार्ने उद्देश्यले विद्यार्थी डायरी वितरण गरिएको छ ।

विद्यालयमा आयोजित कार्यक्रममा विद्यार्थीहरूलाई डायरी वितरण गर्दै वडा नम्बर–७ का वडाध्यक्ष निरज कुमार साह (मुन्ना)ले शिक्षाको गुणस्तर सुधार अभिभावक, शिक्षक र विद्यार्थीको त्रिपक्षीय सहकार्यबिना सम्भव नभएको बताए ।

उनले भने, ‘डायरी वितरणले विद्यार्थीहरूमा अनुशासन र जिम्मेवारीको भावना विकास गर्छ । यसले शिक्षक र अभिभावकबीचको दैनिक सम्पर्क सहज बनाउँछ र विद्यार्थीको प्रगति नजिकबाट निगरानी गर्न मद्दत पुर्याउँछ ।’

वडाध्यक्ष साहका अनुसार स्थानीय सरकारको प्राथमिकता शिक्षाको गुणस्तर वृद्धि र विद्यालय व्यवस्थापनमा अभिभावकको सक्रिय सहभागिता सुनिश्चित गर्नु हो । उनले वडा कार्यालयले आगामी दिनमा विद्यालयको भौतिक पूर्वाधार सुधार र सिकाइ सामग्री सहयोगमा निरन्तर ध्यान दिने पनि बताए ।

वडाध्यक्ष साहले विद्यालयको बाउन्ड्रि वाल निर्माण गर्नुका साथै दुई वटा चारकोठे भवन र एउटा दुईकोठे भवन पनि निर्माण गरेका छन् । साथै साइन्स ल्याब र आइसिटि ल्याब पनि सञ्चालनमा ल्याइएको छ ।

डायरी वितरण कार्यक्रममा विद्यालयका प्रधानाध्यापक, शिक्षक तथा विद्यार्थीहरूको सहभागिता रहेको थियो । सहभागीहरूले विद्यार्थी डायरीलाई शिक्षा र व्यवहारिक सुधारको महत्वपूर्ण साधनका रूपमा लिएको बताए ।