जनकपुरधाम, २७ कार्तिक । मधेश प्रदेश सभामुख रामचन्द्र मण्डलले आफुविरुद्ध पदअनुकूल आचरण नगरेको प्रस्ताव दर्ता भएपछि पाँच जना सांसदलाई पदमुक्त गरेका छन् ।

सभामुख मण्डलले प्रदेशसभा बैठकमा लगातार १० पटक अनुपस्थित भएको आधारमा उनीहरूलाई सदस्य पदबाट हटाएको बताएका छन् ।

पदमुक्त हुने सांसदमा नागरिक उन्मुक्ति पार्टीकी उर्मिला देवी सिंह, जसपा नेपालका मनिष कुमार सुमन, संजय कुमार यादवका साथै सिंहासन सा कलवार र शारदा शंकर प्रसाद कलवार रहेका छन् । सभामुखको कार्यालयले उनीहरूलाई पदमुक्त गरिएको सूचना प्रकाशित गरेको छ ।

सूचनामा भनिएको छ, ‘संविधानको धारा १८० (घ) अनुसार मधेश प्रदेश सभा बैठकको अभिलेखमा लगातार १० बैठकमा अनुपस्थित रहेका सांसदहरू कार्तिक २७ गतेदेखि प्रदेशसभा सदस्यबाट पदमुक्त भएको हुँदा उनीहरूको पद रिक्त भएको छ । यस निर्णयको सूचना सम्बन्धित सबैको जानकारीको लागि प्रकाशित गरिएको छ ।’

प्रदेशसभा कार्य सञ्चालन नियमावली, २०७५ को नियम १८५ अनुसार सदस्यलाई लगातार बैठकमा अनुपस्थित रहँदा पदमुक्त गर्न सक्ने प्रावधान छ ।