जनकपुरधाम, २७ कार्तिक । मधेश प्रदेशको राजनीतिक तनाव झन् चुलिएको छ । सभामुख रामचन्द्र मण्डलविरुद्ध पदअनुकूल आचरण नगरेको प्रस्ताव दर्ता गर्न पुगेका सात दलीय गठबन्धनका सांसदहरू बिहीबार करिब दुई घण्टा उपसभामुख बबिताकुमारी राउत ईशरको कार्यकक्षमै थुनिएका थिए । उनीहरू अन्ततः प्रहरीको सहयोगमा बाहिरिएका छन् ।

सांसदहरू उपसभामुखको कार्यकक्षमा प्रस्ताव दर्ता गर्ने क्रममा नेकपा एमालेका कार्यकर्ता र सभामुख मण्डल पक्षका नेतासँग हात हालाहालसम्मको स्थिति उत्पन्न भएको थियो । प्रस्ताव दर्ताको प्रक्रिया पूरा भए पनि सभामुख मण्डलले सचिवालयका कर्मचारीलाई दर्ता रोक्न निर्देशन दिएको आरोप सांसदहरूले लगाएका छन् ।

लामो रस्साकस्सीपछि अन्ततः कर्मचारीले प्रस्ताव दर्ता गरेपछि सांसदहरूले कार्यकक्षबाट बाहिरिने प्रयास गरेका थिए । तर, त्यस क्रममा सभामुख र उनका समर्थकहरूले कार्यकक्षको ढोका बन्द गरी आफूहरूलाई ‘थुनेको’ आरोप सात दलीय सांसदहरूले लगाएका छन् ।

जनमत पार्टीका संसदीय दलका नेता महेशप्रसाद यादवले भने, ‘हामीले सभामुखविरुद्ध प्रस्ताव दर्ता गर्यौं । तर, निस्कन खोज्दा सभामुख पक्षले हामीलाई रोक्यो । परिस्थिती तनावपूर्ण बन्दा प्रहरीले आएर हामीलाई बाहिर निकालेको हो ।’

सभामुख मण्डलले भने आरोप अस्वीकार गरेका छन् । उनले आफूले कसैलाई थुनेको वा हातपात नगरेको बताउँदै उल्टै सांसदहरू स्वयं लामो समय उपसभामुखको कार्यकक्षमा बसेको दाबी गरे ।

‘उहाँहरू आफैं आउनुभएको थियो, बस्नुभयो, मैले पनि बोलाएँ तर आउनुभएन,’ सभामुख मण्डलले भने, ‘पछि प्रहरी आए र उहाँहरू निस्किनुभयो । हामीले कसैलाई बन्धक बनाएका होइनौं ।’

स्रोतका अनुसार कार्यकक्षमा भएको तनावपछि प्रदेशसभा सचिवालयको वातावरण लामो समय अशान्त बनेको थियो ।

राजनीतिक रूपमा संवेदनशील यो घटना सभामुख मण्डलविरुद्ध पदअनुकूल आचरण नगरेको प्रस्तावको प्रक्रियासँग जोडिएको छ । सात दलीय गठबन्धनले ६४ सांसदको हस्ताक्षरसहित सभामुख मण्डललाई पदमुक्त गर्न माग गर्दै प्रस्ताव दर्ता गरेको हो ।

संविधान र प्रदेशसभा नियमावलीअनुसार सभामुखविरुद्धको प्रस्ताव पारित गर्न दुई तिहाइ बहुमत आवश्यक हुन्छ ।