जनकपुरधाम, २७ कार्तिक । मधेश प्रदेशका नवनियुक्त प्रदेश प्रमुख डा. सुरेन्द्र लाभ कर्णले बिहीबार पदभार ग्रहण गरेका छन् । राजधानी काठमाडौंबाट जनकपुरधाम आइपुगेका डा. लाभलाई विमानस्थलदेखि प्रदेश प्रमुख कार्यालयसम्म भव्य स्वागत गरिएको थियो ।

पदभार ग्रहण समारोहमा बोल्दै डा. लाभले आफू मधेश प्रदेशका समस्या, चुनौती र सम्भावनासँग परिचित रहेको बताए । उनले प्रदेशको समृद्धि र स्थायित्वका लागि सबै राजनीतिक शक्ति र निकायबीच सहकार्य र समन्वय आवश्यक भएको उल्लेख गर्दै भने, ‘म सबै पक्षसँग मिलेर मधेशको विकास र सुशासनका लागि काम गर्नेछु ।’

गत सोमबार प्रदेशको राजनीतिक परिवेश फेरि तातिएको थियो । तत्कालीन प्रदेश प्रमुख सुमित्रा सुवेदी भण्डारीले संविधानको धारा १६८ (३) बमोजिम नेकपा एमाले संसदीय दलका नेता सरोजकुमार यादवलाई मुख्यमन्त्रीमा नियुक्त गरी होटलमा शपथ ग्रहण गराएकी थिइन् ।

सो घटनालाई विपक्षी दलहरूले संविधान विपरीतको कार्य भन्दै तीव्र विरोध जनाएपछि भण्डारीलाई सरकारको सिफारिसमा पदमुक्त गरिएको थियो ।

त्यसपछि संघीय सरकारको सिफारिसमा राष्ट्रपति रामचन्द्र पौडेलले डा. लाभलाई नयाँ प्रदेश प्रमुखका रूपमा नियुक्त गरेका थिए । बुधबार उनले राष्ट्रपति निवास शीतल निवासमा पद तथा गोपनीयताको शपथ ग्रहण गरेका थिए ।

डा. लाभ एक शैक्षिक र बौद्धिक क्षेत्रका व्यक्तित्वका रूपमा परिचित छन् । उनको नियुक्तिसँगै मधेश प्रदेशको राजनीतिक विवादमा नयाँ मोड आउने विश्वास गरिएको छ ।