सर्लाही, २६ कार्तिक । सर्लाही जिल्लामा मध्य कार्तिकको तीन दिनको अविरल वर्षाले धान बालीमा व्यापक क्षति पुर्याएको छ । तर, अहिलेसम्म क्षतिको पूर्ण विवरण सङ्कलन हुन सकेको छैन ।

कार्तिक १३ देखि १५ गतेसम्मको वर्षाले कट्न लागेका र काटिसकेका धान खेत भिजेर खेतमै नष्ट भएका हुन् । कृषि ज्ञान केन्द्र सर्लाहीले जिल्लाका २० वटै पालिकालाई पत्र लेख्दै तीन दिनभित्र क्षतिको विवरण उपलब्ध गराउन आग्रह गरे पनि अहिलेसम्म कार्यालयलाई कुनै पूर्ण विवरण प्राप्त भएको छैन ।

हरेक किसानले वर्षाबाट पुगेको क्षतिको वास्तविक अवस्था कसैले नसोधी बुझ्न आएको छैन भन्ने गुनासो गरेका छन् । हरिपुर नगरपालिका–२ सानो जगतपुरका किसान हेम थापाले भने, ‘सरकारले राहत दिने कुरा गर्छ तर अहिलेसम्म कोही आएर क्षति सोध्न आएनन् । तीन दिन पानीमा भिजेर खेतमै उम्रिएको धानलाई जस्तोसुकै तरिकाले भित्र्यायौँ । तर, कसैले वास्ता गरेन ।’

किसानहरूले तीन दिनको लगातार पानी र डुबानमा परेको धानबाट आएको आर्थिक क्षतिबारे चिन्ता व्यक्त गरेका छन् ।

स्थानीय तहका कृषि शाखाका अधिकारीहरूले अघिल्ला वर्षहरूमा वर्षाबाट धान तथा अन्य बालीमा पुगेको क्षतिको विवरण सङ्कलन गर्दा किसानले राहत नपाएको अनुभव गरेका कारण पुनः विवरण लिन जान कठिनाइ भएको बताएका छन् ।

बागमती नगरपालिका कृषि शाखाका प्रमुख अवधेश झाले भने, ‘पहिले पठाइएको डाटाबाट केही पाइएन । किसानले आफूले केही पाउने आशा नगरेको कारण विवरण दिन आनाकानी गर्छन् । यसैले डाटा सङ्कलनमा समस्या आएको हो ।’

उनले प्रत्येक वडा कार्यालयलाई पत्र काटेर बालीमा पुगेको क्षतिको विवरण उपलब्ध गराउन निर्देशन दिएको बताए ।

सर्लाहीमा यस वर्ष ३९,४९० हेक्टरमा धान खेती भएको छ । कृषि ज्ञान केन्द्र मलङ्गवाका सूचना अधिकारी सीमा कार्कीले भनिन्, ‘गत वर्षभन्दा कम क्षेत्रफलमा धान खेती भएको छ । असोज र कात्तिकको भारी वर्षाले उत्पादनमा गिरावट आउन सक्छ ।’

हालसम्म जिल्लाभर करिब १,००० हेक्टर धानमा क्षति पुगेको प्रारम्भिक विवरण प्राप्त भए पनि सबै पालिकाले विवरण उपलब्ध गराउन सकेका छैनन् ।

त्यस्तै, महिना दिनको अन्तरालमा परेको भारी वर्षाले जिल्लामा २५० हेक्टर उखु बाली र २०० हेक्टर तरकारी बालीमा पनि क्षति पुर्याएको छ ।