पर्सा, २६ कार्तिक । पर्सा जिल्लामा अनुचित लेनदेन (मिटरब्याज) सम्बन्धी एक हजार ६९७ उजुरी मेलमिलापमार्फत टुङ्ग्याइएको छ । यस क्रममा २९ करोड १२ लाख ८५ हजार ५९७ बराबरको बिगो फिर्ता गरिएको जिल्ला प्रहरी कार्यालय पर्साले जनाएको छ ।

प्रहरीका अनुसार मिटरब्याजका साहुकार र पीडितबीच मेलमिलापको प्रक्रियाबाट धेरै उजुरी समाधानमा पुगेका छन् भने बाँकी ६ सय ३५ उजुरी हाल पनि फछ्र्योटको क्रममा रहेका छन् ।

जिल्ला प्रहरी कार्यालयका प्रवक्ता डीएसपी हरिबहादुर बस्नेतका अनुसार पर्साभर दुई हजार ३६७ उजुरी दर्ता भएका छन् । उनी भन्छन्, ‘मेलमिलाप र फिर्ता प्रक्रियाबाट ठुलो मात्रामा रकम र जग्गा पीडितहरूलाई दिलाउन सफल भएका छौं । तर, अझै केही उजुरी अनुसन्धान र कानुनी प्रक्रियामा छन् ।’

उनका अनुसार अहिलेसम्म ४० बिघा १५ कट्ठा १९ धुर जग्गा पनि पीडितलाई फिर्ता गराइएको छ ।

मिटरब्याजविरुद्ध किसान मजदुर आन्दोलनका सचिव शम्भुप्रसाद यादवले भने, ‘एक लाख ऋण दिएर तीन लाखसम्मको तमसुक बनाउने साहुकारको प्रवृत्ति अझै पनि रोकिएको छैन । अझै पनि वास्तविक पीडितहरू न्यायका लागि भौतारिरहेका छन् ।’

उनले सरकारले स्थायी समाधानका लागि कडा कानुनी संरचना र प्रभावकारी निगरानी संयन्त्र स्थापना गर्नुपर्ने माग गरे ।

पोखरिया नगरपालिकाका कनैयाप्रसाद यादवले पाँच वर्षअघि एक लाख १० हजार ऋण लिए पनि साहुकारले तीन लाख ३० हजारको तमसुक बनाएको बताए । उनले भने, ‘हामीले ऋण तिरिसक्दा पनि साहुकारले तमसुकका नाममा धम्की दिन्छन् । सरकारले यस्ता गतिविधि नियन्त्रण गर्न गम्भीर हुनुपर्छ ।’

जिल्ला प्रशासन कार्यालय र प्रहरीको संयुक्त अभियानबाट पछिल्ला महिनाहरूमा मिटरब्याज सम्बन्धी उजुरीहरू तीव्र गतिमा टुङ्ग्याइँदै आएका छन् । प्रहरीका अनुसार मेलमिलापसँगै केही घटनामा साहुकारमाथि कानुनी कारबाही पनि अगाडि बढाइएको छ ।