जनकपुरधाम, २६ कार्तिक । मधेश प्रदेशका मुख्यमन्त्री सरोजकुमार यादवले सात राजनीतिक दलको प्रदर्शनका क्रममा घाइते भएकाहरूको सम्पूर्ण उपचार खर्च प्रदेश सरकारले व्यहोर्ने घोषणा गरेका छन् ।

मुख्यमन्त्री यादवले बुधबार बिहान जनकपुरधामस्थित प्रादेशिक अस्पताल पुगेर घाइतेहरूको स्वास्थ्य अवस्था बुझ्दै उपचारका लागि आवश्यक सबै खर्च सरकारको जिम्मेवारीमा रहने स्पष्ट गरेका हुन् ।

अस्पतालमा चिकित्सकसँग उपचारको अवस्थाबारे जानकारी लिएपछि मुख्यमन्त्री यादवले भने, ‘घाइते सबै नागरिक हाम्रो परिवारका सदस्य हुन् । उनीहरूको उपचार खर्च प्रदेश सरकारले नै बेहोर्छ ।’

अस्पताल स्रोतका अनुसार अधिकांश घाइतेहरूको अवस्था सामान्य रहेको छ ।

मंगलबार मुख्यमन्त्री यादवले पदभार ग्रहण गरिरहँदा मधेश भवन बाहिर सात राजनीतिक दलका नेता र कार्यकर्ताहरूले असंवैधानिक नियुक्तिविरुद्ध प्रदर्शन गरेका थिए । सो क्रममा प्रहरीले लाठीचार्ज गर्दा १६ जनाभन्दा बढी घाइते भएका थिए ।

घाइतेहरूलाई तत्कालै प्रादेशिक अस्पतालमा उपचारका लागि ल्याइएको थियो । प्रहरीले भने प्रदर्शन नियन्त्रणका लागि न्यूनतम बल प्रयोग गरिएको दाबी गरेको छ ।

मुख्यमन्त्री सरोज यादवको नियुक्तिलाई नेपाली कांग्रेस, जसपा नेपाल, जनमत पार्टी, लोकतान्त्रिक समाजवादी पार्टी, नेकपा माओवादी केन्द्र, नेकपा (एकीकृत समाजवादी) र नागरिक उन्मुक्ति पार्टीले असंवैधानिक र जनमतविपरीत भन्दै विरोध गरिरहेका छन् ।

मंगलबारदेखि उनीहरूले मधेश भवनको गेटअगाडि शान्तिपूर्ण धर्ना सुरु गरेका छन् । आन्दोलनकारीहरूका अनुसार संविधानको धारा उल्लङ्घन गर्दै यादवलाई मुख्यमन्त्री बनाइएको हो ।