जनकपुरधाम, २६ कार्तिक । मधेश प्रदेशका मुख्यमन्त्री नेकपा एमालेका नेता सरोजकुमार यादवको नियुक्ति असंवैधानिक भएको आरोप लगाउँदै सात दलका सांसद र कार्यकर्ताले बुधबारदेखि शान्तिपूर्ण धर्ना सुरु गरेका छन् ।

प्रदेश सरकारको मुख्यालय रहेको मधेश भवनको २ नम्बर गेटअगाडि बिहानैदेखि सुरु गरिएको धर्नामा नेपाली कांग्रेस, जनता समाजवादी पार्टी (जसपा) नेपाल, जनमत पार्टी, लोकतान्त्रिक समाजवादी पार्टी (लोसपा), नेकपा माओवादी केन्द्र, नेकपा (एकीकृत समाजवादी) र नागरिक उन्मुक्ति पार्टीका सांसदसहित कार्यकर्ताहरूको उपस्थिति रहेको छ ।

धर्नामा सहभागी नेताहरूले मुख्यमन्त्री यादवको नियुक्ति संविधानको मर्म र लोकतान्त्रिक अभ्यास विपरीत गरिएको भन्दै तत्काल खारेजीको माग गरेका छन् । उनीहरूले संविधानको रक्षा, लोकतन्त्रको सम्मान र जनमतको पक्षमा नारासहित आन्दोलनका कार्यक्रम थालेका छन् ।

मंगलबार साँझ जनकपुरधाममा भएको शान्तिपूर्ण विरोधमा प्रहरीले दमन गरेको आरोप लगाउँदै सात दलले गएराति नै संयुक्त विज्ञप्ति जारी गर्दै आन्दोलनका थप कार्यक्रम घोषणा गरेका थिए ।

जसपा नेपालका प्रमुख सचेतक रामशष यादवले अदालतको अन्तरिम आदेशप्रति सन्तुष्टि जनाउँदै भने, ‘अदालतले संविधानको मर्यादा जोगाउने दिशामा कदम चालेको छ । अब असंवैधानिक रूपमा गरिएको मुख्यमन्त्री नियुक्ति खारेज हुनैपर्छ ।’

उनले थपे, ‘७४ सांसदको हस्ताक्षरसहित दर्ता गरिएको रिट स्पष्ट प्रमाण हो कि वर्तमान मुख्यमन्त्रीले बहुमत गुमाइसकेका छन् । कानुनी र सडक दुवै बाटोबाट न्याय प्राप्त गर्न हामी आन्दोलनमा उत्रिएका हौं ।’

यसैबीच, नवनियुक्त मुख्यमन्त्री सरोजकुमार यादव बुधबार बिहान काठमाडौं प्रस्थान गरेका छन् । उनी बिहानै जनकपुरधामस्थित प्रादेशिक अस्पताल पुगेर मंगलबारको प्रदर्शनमा घाइते भएका कार्यकर्ताहरूलाई भेटेका थिए । अस्पताल स्रोतका अनुसार सबै घाइतेहरू गएराति नै डिस्चार्ज भई घर फर्किसकेका छन् ।

मुख्यमन्त्री यादवले मधेश भवनको पछाडिको बाटो प्रयोग गरेर गोप्य रूपमा पदभार ग्रहण गरेको स्रोतले जनाएको छ । विपक्षी दलहरूले यसलाई सार्वजनिक उत्तरदायित्वबाट डराउने प्रवृत्ति भन्दै आलोचना गरेका छन् ।

सातै दलका नेताहरूले संयुक्त रूपमा भनेका छन्, ‘संविधानको धारा उल्लंघन गरेर बनाइएको यो सरकार लोकतान्त्रिक मूल्य र परम्पराको अपमान हो । अदालतले न्यायोचित निर्णय लिने विश्वासका साथ हामी सडक आन्दोलन जारी राख्छौं ।’

आन्दोलनकारीहरूले धर्नालाई अहिलेसम्म पूर्ण रूपमा शान्तिपूर्ण ढंगले सञ्चालन गरिरहेका छन् । मधेश भवनअगाडि प्रहरीले सुरक्षा व्यवस्था कडा बनाएको छ ।