नयाँ दिल्ली, २४ कार्तिक । भारतको राजधानी नयाँ दिल्लीस्थित लाल किल्ला मेट्रो स्टेशन नजिक सोमबार साँझ भएको भीषण कार विस्फोटमा ११ जनाको मृत्यु भएको छ भने २४ जना घाइते भएका छन् । दिल्ली प्रहरीका अनुसार विस्फोट अत्यन्त शक्तिशाली थियो । त्यसको प्रभाव नजिकका अन्य सवारी साधन र पसलसम्म पुगेको छ ।

विस्फोटपछि घटनास्थल वरिपरि करिब ५० मिटर क्षेत्र नियन्त्रणमा लिइएको छ । घाइतेहरुलाई नजिकको एलएनजेपी अस्पताल र सफदरजङ अस्पतालमा उपचारका लागि भर्ना गरिएको छ । केहीको अवस्था गम्भीर रहेको बताइएको छ ।

दिल्ली प्रहरी कमिश्नर सतीश गोलचाले पत्रकार सम्मेलनमा भने, ‘साँझ करिब ७ः४५ बजे रेड सिग्नलमा रोकिएको सेतो रंगको स्विफ्ट डिजायर कारमा अचानक विस्फोट भयो । कार बिस्तारै गुडिरहेको अवस्थामा आगोको ठूलो मुस्लो उठ्यो र वरपर रहेका गाडीहरू पनि क्षतिग्रस्त भए ।’

घटनास्थलमा रहेका एक अटो चालकले विस्फोट भएको कारकै छेउमा आफ्नो सवारी रहेको बताएका छन् । उनका अनुसार विस्फोटको केही सेकेन्डपछि तिनका कान बज्न थाले र गाडीको सिसा फुट्यो ।

विस्फोटको सूचना मिलेसँगै दिल्ली दमकल विभागका करिब दर्जनभन्दा बढी गाडीहरू घटनास्थलमा पठाइएका थिए । आगो नियन्त्रणमा लिएपछि सुरक्षा बलले कारको अवशेष र वरपरका टुक्राहरू संकलन गरी फरेन्सिक अनुसन्धान सुरु गरेको छ ।

प्रारम्भिक अनुसन्धान अनुसार कारभित्र उच्च विस्फोटक पदार्थ (संभवतः इम्प्रोभाइज्ड एक्स्प्लोसिभ डिभाइस) राखिएको हुनसक्ने आशंका प्रहरीले व्यक्त गरेको छ । प्रहरीले घटनास्थल नजिकको सीसीटीभी फुटेज संकलन गर्दै कार कसको नाममा दर्ता थियो भन्ने खोजी सुरु गरेको छ ।

फरेन्सिक टोलीका एक सदस्यका अनुसार विस्फोटको तीव्रता र क्षतिका आधारमा यो योजनाबद्ध आक्रमण हुनसक्ने सम्भावना उच्च छ ।

दिल्लीमा विस्फोट भएपछि मुम्बई, हरियाणा र उत्तर प्रदेशका प्रमुख सहरहरूमा पनि उच्च सतर्कता जारी गरिएको छ । सार्वजनिक स्थल, रेल्वे स्टेशन र बजार क्षेत्रमा सुरक्षा निगरानी कडा पारिएको छ ।

गृहमन्त्री अमित शाहले घटनापछि दिल्ली प्रहरी, एनआईए (राष्ट्रिय अनुसन्धान एजेन्सी) र फरेन्सिक टोलीबीच समन्वय गरी तत्काल सत्यतथ्य बाहिर ल्याउन निर्देशन दिएका छन् । प्रधानमन्त्री नरेन्द्र मोदीले पनि मृतकका परिवारप्रति समवेदना व्यक्त गर्दै घटनाको दोषीलाई कठोर कारबाही हुने बताएका छन् ।

घटनापछि लाल किल्ला मेट्रो स्टेशन वरिपरि आवागमन अस्थायी रूपमा बन्द गरिएको छ । प्रहरी र बम निष्क्रिय टोलीले सम्पूर्ण क्षेत्र स्क्यान गरिरहेका छन् । दिल्लीका नागरिकमा त्रासको वातावरण फैलिएको छ भने प्रहरी प्रशासनले शान्त रहन र अफवाहमा नफस्न आग्रह गरेको छ ।

सुरक्षा निकायले घटनाको विस्तृत विवरण सार्वजनिक नभएसम्म क्षेत्रका सबै नजिकका सडकमा प्रवेश निषेध गरेको छ । विस्फोटको कारण र पृष्ठभूमि पत्ता लगाउन अनुसन्धान तीव्र पारिएको दिल्ली प्रहरी स्रोतले जनाएको छ ।