जनकपुरधाम, २४ कार्तिक । सरकारले मधेश प्रदेशका नयाँ प्रमुखका रूपमा सुरेन्द्र लाभ ‘कर्ण’को नाम सिफारिस गरेको छ ।

सोमबार बसेको मन्त्रिपरिषद्को बैठकले कर्णलाई मधेश प्रदेश प्रमुखमा नियुक्तिका लागि राष्ट्रपति समक्ष सिफारिस गर्ने निर्णय गरेको हो ।

अर्थशास्त्रका प्राध्यापकका रूपमा चिनिएका कर्ण त्रिभुवन विश्वविद्यालय अन्तर्गतको महेन्द्र महाविद्यालयमा करिब चार दशकसम्म अध्यापनमा संलग्न रहे । उनले सन् २०३६ सालदेखि २०७२ सालसम्म विश्वविद्यालय सेवामा रहेर अर्थशास्त्रका विद्यार्थीलाई अध्यापन गराएका थिए ।

त्यसपछि उनी राष्ट्रिय योजना आयोगका सदस्यका रूपमा सन् २०२२ देखि २०२३ सम्म कार्यरत रहे । विकास योजना, प्रदेश–संघीय आर्थिक नीतिको अध्ययन र सार्वजनिक नीति निर्माणमा सक्रिय भूमिका निर्वाह गर्दै आएका कर्ण मधेश प्रदेशको आर्थिक र शैक्षिक क्षेत्रसँग गहिरो सम्बन्ध राख्ने व्यक्ति मानिन्छन् ।

प्राध्यापक कर्णले आर्थिक नीति, क्षेत्रीय विकास र सार्वजनिक वित्त व्यवस्थापनमा धेरै अनुसन्धानात्मक लेख प्रकाशित गरेका छन् । उनी मैथिली साहित्यमा पनि परिचित नाम हुन् ।

मैथिली, नेपाली र हिन्दी तीनै भाषामा कलम चलाउँदै आएका उनको दर्जनौँ लेख, कविता र निबन्ध विभिन्न पत्रपत्रिका तथा साहित्यिक पत्रिकामा प्रकाशित छन् ।

हालै विवादास्पद निर्णयका कारण पूर्व प्रदेश प्रमुख सुमित्रा सुवेदी भण्डारीलाई पदमुक्त गरेपछि सरकारले नयाँ प्रमुखका रूपमा कर्णको नाम अघि सारेको हो । भण्डारीले संविधानको धारा १६८(३) अनुसार एमाले नेता सरोजकुमार यादवलाई जनकपुरबाट काठमाडौं जानुअघि नै होटलमा मुख्यमन्त्री नियुक्त गरेकी थिइन् । त्यसपछि राजनीतिक विवाद चर्किएको थियो ।

मधेश प्रदेशका बौद्धिक र शैक्षिक वृत्तले सुरेन्द्र लाभ कर्णको सिफारिसलाई सन्तुलित र शालीन व्यक्तित्वको रूपमा स्वागत गरेका छन् । उनीहरूका अनुसार मधेश प्रदेशको जटिल राजनीतिक अवस्थालाई संवैधानिक रूपमा सन्तुलित राख्न कर्ण उपयुक्त व्यक्ति हुन सक्छन् ।

राष्ट्रपतिद्वारा औपचारिक नियुक्ति भएपछि कर्णले मधेश प्रदेश प्रमुखको रूपमा जिम्मेवारी सम्हाल्नेछन् । सरकारको निर्णय राष्ट्रपति कार्यालयमा पठाइसकिएको र छिट्टै आधिकारिक नियुक्ति हुने तयारी रहेको प्रधानमन्त्री कार्यालयले जनाएको छ ।