जनकपुरधाम, २४ कार्तिक । सरकारले मधेश प्रदेश प्रमुख सुमित्रा सुवेदी भण्डारीलाई पदबाट हटाएको छ । सोमबार बसेको मन्त्रिपरिषद् बैठकले संविधानविपरीत कार्य गरेको ठहर गर्दै उनलाई पदमुक्त गर्ने निर्णय गरेको हो ।

सरकारका प्रवक्ता एवम् सञ्चार तथा सूचना प्रविधि मन्त्री जगदिश खरेलले सोमबार साँझ मन्त्रिपरिषद्को निर्णय सार्वजनिक गर्दै भने, ‘मधेशमा पछिल्ला घटनाक्रमका आधारमा प्रदेश प्रमुख सुमित्रा सुवेदी भण्डारीलाई पदबाट हटाइएको हो । संविधान र संघीय अभ्यासविपरीत निर्णय लिएकी भएकाले सरकारले आवश्यक निर्णय गर्न बाध्य भएको हो ।’

भण्डारीको पदमुक्तिसँगै मधेश प्रदेशको हालैको राजनीतिक संकट नयाँ मोडमा पुगेको छ ।

मधेश प्रदेशमा उत्पन्न विवादको केन्द्रमा रहेका प्रमुख भण्डारीले संविधानको धारा १६८ को उपधारा (३) बमोजिम एमाले नेता सरोजकुमार यादवलाई मुख्यमन्त्री नियुक्त गरेकी थिइन् ।

त्यो पनि अस्वस्थ भएको भन्दै जनकपुरधामबाट काठमाडौं प्रस्थान गर्ने क्रममा होटल पानसमा बसेर उनले नियुक्तिपत्र जारी गरेकी थिइन् । सोही होटलमा भण्डारीले यादवलाई मुख्यमन्त्रीको शपथ पनि खुवाएकी थिइन् ।

यो घटनाले मधेश प्रदेशको राजनीतिक वातावरण झनै तनावग्रस्त बनाएको थियो । प्रमुख भण्डारीले आफू अस्वस्थ भएको कारण काठमाडौं फर्किएको बताइरहेकी थिइन् । तर, सोही समयमा होटलबाट संवैधानिक निर्णय गर्नु गैरजिम्मेवार र असंवैधानिक भएको भन्दै उनको व्यापक आलोचना भएको थियो ।

प्रदेश प्रमुखको उक्त कदमपछि नेपाली कांग्रेस, जनता समाजवादी पार्टी, लोकतान्त्रिक समाजवादी पार्टी, माओवादी केन्द्र, जनमत पार्टी, नागरिक उन्मुक्ति पार्टी र नेकपा (एस) सहितका सात दलले संयुक्त विज्ञप्ति जारी गर्दै धारा १६८(२) अझै जीवित रहेको अवस्थामा उपधारा (३) प्रयोग गर्नु संविधानविपरीत भएको बताएका थिए ।
उनीहरूले प्रदेश प्रमुखलाई तत्काल सो निर्णय फिर्ता लिन आग्रह गरेका थिए ।

मुख्यमन्त्री नियुक्तिको विरोधमा जनकपुरधाममा सोमबार दिनभर प्रदर्शन भएको थियो । लोसपा कार्यकर्ताले मधेश भवन परिसरमा तोडफोड गर्दै प्रदेश प्रमुख र एमालेविरुद्ध नाराबाजी गरेका थिए ।

प्रदर्शन उग्र बनेपछि प्रहरीले हस्तक्षेप गर्नुपरेको थियो भने प्रशासनले प्रदेशमा शान्ति–सुरक्षा कायम राख्न उच्च सतर्कता अपनाएको थियो ।

लोसपा नेता तथा निवर्तमान मुख्यमन्त्री जितेन्द्र प्रसाद सोनलले भण्डारीले प्रदेशको अस्मिता र संघीयताको मर्ममाथि प्रहार गरेको टिप्पणी गरेका थिए ।