जनकपुरधाम, २४ कार्तिक । मधेश प्रदेशका नवनियुक्त मुख्यमन्त्री सरोजकुमार यादवले आफ्नो नियुक्ति संविधान र कानुनअनुसार भएको दाबी गर्दै राजनीतिक विवादमा शान्तिपूर्ण निकास खोज्ने संकल्प व्यक्त गरेका छन् ।

उनले आफूलाई संविधान र संघीयताको रक्षा गर्न जिम्मेवारीसहित अघि बढाइएको नेताको रूपमा चित्रित गर्दै हालको विवादलाई राजनीतिक हिसाब–किताब नभई संवैधानिक समाधानको प्रक्रिया भनेका छन् ।

महोत्तरी–४(क) बाट निर्वाचित एमाले नेता यादवले सोमबार बिहान सञ्चारकर्मीहरूसँग कुरा गर्दै भने, ‘म नेपालको संविधान तथा प्रचलित कानूनबमोजिम नै मुख्यमन्त्री नियुक्त भएको हुँ । संविधानलाई बलियो बनाउने, मधेश प्रदेशलाई सबल र स्थिर बनाउने उद्देश्यले नै मलाई जिम्मेवारी दिइएको हो ।’

उनका अनुसार विगतका मुख्यमन्त्रीहरूबाट बारम्बार विश्वासको मत प्राप्त गर्न नसकिँदा उत्पन्न भएको राजनीतिक अन्योल अन्त्य गर्न र संवैधानिक निकास निकाल्न आफू मुख्यमन्त्री बनेका हुन् ।

उनले थपे, ‘संविधानको धारा १६८ को उपधारा (३) बमोजिम प्रदेशको सबैभन्दा ठूलो दलको संसदीय दलको नेता भएको हैसियतमा मैले यो जिम्मेवारी सम्हालेको हुँ । यो संवैधानिक रूपमा पूर्ण वैध प्रक्रिया हो ।’

शपथ ग्रहणको स्थानलाई लिएर उठेको विवादबारे मुख्यमन्त्री यादवले विस्तृत रूपमा स्पष्टीकरण दिएका छन् । उनका अनुसार शपथका लागि बोलाउँदा लोसपाका सांसदहरू प्रदेश प्रमुखको कार्यालय अगाडि नै धर्नामा बसेका थिए । त्यसका कारण सुरक्षा जोखिम र राजनीतिक तनावको अवस्था थियो ।

यादवले भने, ‘शपथ ग्रहणको समय तय भइसकेको थियो । तर, त्यसबेला केही सांसदहरू गेटमै धर्ना बस्नुभयो । मैले पनि भनेको थिएँ, वातावरण बिग्रिएको छ, यस्तोमा विवाद गर्न खोज्दिनँ । त्यसैले प्रदेश प्रमुखज्यूलाई विनम्रतापूर्वक भनेँ, ‘शपथका लागि कुनै शान्त ठाउँमा गरौं, उपचारका क्रममा हुनुहुन्छ भने उभिएरै भए पनि शपथ गराइदिनुस् ।’ उहाँले ‘ल, बर्दिबास आउनुस्’ भन्नुभयो, त्यसपछि हामीले त्यहीँ शपथ खायौं ।’

मुख्यमन्त्री यादवले प्रदेश प्रमुख सुमित्रा सुवेदी भण्डारीको स्वास्थ्य अवस्था कमजोर रहेको बताउँदै शपथ स्थलको निर्णय पनि व्यावहारिक परिस्थितिबाट बाध्य भएर गरिएको दाबी गरे ।

‘प्रदेश प्रमुखज्यू साँच्चिकै बिरामी हुनुहुन्थ्यो, उहाँले उपचारका लागि काठमाडौँ जानुहुन्थ्यो । त्यस्तो अवस्थामा उहाँले पनि जिम्मेवारी पूरा गर्न चाहनुभयो, त्यसैले हामीले छोटकरीमा बर्दिबासमा शपथ ग्रहण गर्यौं,’ यादवले स्पष्ट पारे ।

मुख्यमन्त्री यादवले संघीयता र संविधानको मर्मबारे उठेका आरोपहरूलाई अस्वीकार गर्दै भने, ‘संघीयता–संघीयता भनेर दिनरात चिच्याउनेहरूकै कारण संघीयताको मर्ममाथि चोट पुगेको हो । संविधानको प्रक्रिया पूरा गरेर आएको सरकारले संघीयता कमजोर पार्दैन, बरु मजबुत बनाउँछ ।’

उनले आफ्नो नेतृत्वमा प्रदेश सरकार विकास, सुशासन र स्थायित्वमा केन्द्रित हुने बताएका छन् । ‘अब मधेशमा राजनीतिक खिचातानी नभई विकासको प्रतिस्पर्धा सुरु हुन्छ,’ यादवले भने ।