जनकपुरधाम, २४ कार्तिक । मधेश प्रदेशका नवनियुक्त मुख्यमन्त्री सरोजकुमार यादवले सोमबार बिहान पदभार ग्रहण गर्ने तयारीसँगै जनकपुरधामको वातावरण राजनीतिक रुपमा अत्यन्त तातेको छ ।

प्रदेश प्रमुख सुमित्रा सुवेदी भण्डारीले रातारात महोत्तरीमा रहेको एक होटलमा यादवलाई मुख्यमन्त्रीको रुपमा शपथ दिलाएपछि त्यसको विरोध जनाउँदै जनकपुरधाम दिनभर प्रदर्शन, नाराबाजी र तोडफोडमा डुब्यो ।

प्रदेश राजधानी जनकपुरधामस्थित मधेश भवन परिसर बिहानैदेखि प्रदर्शनकारी र सुरक्षाकर्मीबीच तनावपूर्ण स्थिति देखिएको थियो । प्रदेश सभा सदस्यहरू सहित लोसपा, कांग्रेस, माओवादी केन्द्र, जनता समाजवादी पार्टीलगायत सात दलका प्रतिनिधिहरूले मुख्यमन्त्री यादवको पदभार ग्रहण रोक्न गेट अगाडि नाराबाजी गर्दै सडकमा टायर बाल्दै विरोध प्रदर्शन गरेका थिए ।

प्रदर्शनकारीहरूले ‘प्रदेश प्रमुख राजीनामा दे’, ‘एमाले–देश छोड्’, ‘संविधान र संघीयता बचाऊ’ जस्ता नारा लगाएका थिए । स्थिति नियन्त्रणमा लिन सुरक्षाकर्मीहरूले मधेश भवनको मुख्य गेट बन्द गरी प्रवेशमा रोक लगाएपछि लोसपा प्रदेश सभा सदस्यहरू गेट तोड्दै जबरजस्ती प्रवेश गर्ने प्रयास गरेका थिए ।

प्रदेश सभा सदस्य र प्रहरीबीच धक्का–मुक्की हुँदै गएको अवस्थामा केही प्रदर्शनकारीहरूले प्रहरीमाथि हातपात र गालीगलौज गरेको देखिएको थियो । भवनभित्र प्रवेश गरेपछि केही प्रदर्शनकारीहरूले मुख्यमन्त्री कार्यालय तथा अन्य मन्त्रालयमा तालाबन्दी र तोडफोड समेत गरेका थिए ।

स्थानीय प्रशासनका अनुसार प्रदर्शनकारीहरूले भवनभित्रका फूलका गमला, कुर्सी र झ्यालका सिसा फुटाएका थिए । यस क्रममा केही सरकारी फाइलहरू समेत क्षतिग्रस्त भएका छन् ।

प्रदेश प्रशासनका एक अधिकारीले भने, ‘स्थिति अत्यन्त तनावपूर्ण बनेको छ । तर, हामी संयम अपनाउँदै मानवीय र भौतिक क्षति रोक्ने प्रयासमा छौं ।’ जिल्ला प्रशासन कार्यालय धनुषाले विज्ञप्ति जारी गर्दै विरोधका कार्यक्रम संयमित ढंगले गर्न आग्रह गरेको छ ।

यसैबीच, लोसपा प्रदेश संसदीय दलका नेता जेनुल राइनले पत्रकारहरूसँग कुरा गर्दै भने, ‘प्रदेश प्रमुख सुमित्रा भण्डारीले संवैधानिक प्रक्रिया बेवास्ता गरेर रातारात होटलमा मुख्यमन्त्री नियुक्त गर्नु निन्दनीय छ । यो प्रदेशको अपमान हो । हामी यस कदमको राजनीतिक र कानूनी रूपमा प्रतिवाद गर्छौं ।’

उता, एमाले नेताहरूले भने घटनालाई संविधानसम्मत निर्णयविरुद्धको षड्यन्त्र भन्दै प्रतिवाद गरेका छन् । उनीहरूका अनुसार एमाले संसदीय दलका नेता यादवलाई संविधानको धारा १६८(३) बमोजिम वैध रूपमा मुख्यमन्त्री नियुक्त गरिएको हो ।

तर, प्रदेश प्रमुखले अस्पताल जान भन्दै जनकपुरधाम छोडेर महोत्तरीको पानस होटलमा गएर गोप्य रूपमा शपथ गराएको विषयले आम नागरिकदेखि कानुनविद्हरूसम्म प्रश्न उठाएको छ ।

राजनीतिक विश्लेषकहरूले यस घटनाले संघीयता र संवैधानिक प्रक्रियामा जनताको विश्वासमा चोट पुर्याएको टिप्पणी गरेका छन् ।

मधेशको राजनीतिमा नयाँ सत्ता समीकरण र पुरानो असन्तुष्टिको मिश्रणले जनकपुरधाम फेरि एकपटक राजनीतिक र प्रशासनिक तनावको केन्द्रबिन्दु बनेको छ ।