जनकपुरधाम, २२ कार्तिक । मधेश प्रदेशका मुख्यमन्त्री जितेन्द्र प्रसाद सोनलले विश्वासको मत लिने पूर्वसन्ध्यामा नै पदबाट राजीनामा दिएका छन् ।

शनिबार विश्वासको मतका लागि बोलाइएको प्रदेशसभा बैठकमा उनले प्रत्यक्ष रूपमा सभामुखको व्यवहार र प्रक्रियामाथि आपत्ति जनाउँदै सदनमै राजीनामा घोषणा गरेका हुन् ।

मुख्यमन्त्री सोनलले बहुमत प्राप्त नहुने निश्चित भएपछि आफ्नो राजनीतिक मर्यादा र संसदीय परम्परालाई सम्मान गर्दै पदत्याग गरेको बताए । उनका अनुसार सभामुख रामचन्द्र मण्डलले सत्ता पक्षका सांसदहरूलाई सभामा सहभागी हुन समय नदिई हतारमा मत विभाजनको प्रक्रिया अघि बढाएका थिए । त्यस कारण उनले राजीनामा दिने निर्णय गरेका हुन् ।

सोनलले भने, ‘सत्ता पक्षका केही सांसदहरू केही क्षणका लागि बाहिर गएका थिए । मैले सभामुखसँग आधा घण्टा समय मागेँ, वातावरण बनाउन आग्रह गरेँ । तर, पटक पटक घण्टी बजाएर प्रक्रियामा जान खोजिएपछि मैले पदबाट राजीनामा गर्ने निर्णय लिएँ ।’

प्रदेशसभाबाट बाहिरिएपछि पत्रकारहरूसँग कुरा गर्दै सोनलले संघीयताको मर्ममाथि नै प्रहार भइरहेको टिप्पणी गरे । उनले भने, ‘प्रदेशसभालाई नियन्त्रणमा राखेर संघीयतालाई समाप्त पार्ने खेल भइरहेको देखिन्छ । लोकतान्त्रिक मूल्य र प्रक्रियाको सम्मान नगर्ने प्रवृत्तिले प्रदेशलाई अस्थिरताको दिशामा लैजाँदैछ ।’

सोनलले आगामी राजनीतिक घटनाक्रम संघीय लोकतान्त्रिक मूल्यमा आधारित भएर अघि बढ्नुपर्नेमा जोड दिँदै भने, ‘अब जसले बहुमत जुटाउँछ, उसले संवैधानिक ढङ्गले सरकार बनाओस् । मैले त्यसका लागि बाटो खुला गरेको छु ।’

यससँगै मधेश प्रदेशमा फेरि सत्ता समीकरणका नयाँ सम्भावनाहरूबारे राजनीतिक वृत्तमा चर्चा सुरु भएको छ । मुख्यमन्त्री बनेको २५ दिनमै पदबाट राजीनामा दिएका सोनलको निर्णयसँगै प्रदेशको राजनीतिक स्थायित्व पुनः अनिश्चित बनेको छ ।