जनकपुरधाम, २२ कार्तिक । मधेश प्रदेशमा मुख्यमन्त्री जितेन्द्र प्रसाद सोनलको सरकार ढलेपछि सत्ता पक्षले विपक्षी दल र सभामुखको भूमिका आरोपित गरे पनि विपक्षी दलहरूले उक्त दाबी अस्वीकार गरेका छन् ।

नेकपा एमालेका संसदीय दलका नेता सरोजकुमार यादवले सोनल सरकार आफ्नै आन्तरिक विवाद र कमजोर समन्वयका कारण ढलेको प्रतिक्रिया दिए ।

उनले भने, ‘आफ्नै कारणले ढलेका छन्, त्यसमा विपक्षीको हात छैन । संसदमा हारजित स्वाभाविक हो, त्यसलाई संघीयताको संकटका रूपमा चित्रण गर्नु अनुचित हो ।’ यादवले सत्ता पक्षले दलगत एकता कायम गर्न नसकेको कारण अन्ततः सरकार असफल भएको बताए ।

नेपाली कांग्रेसका संसदीय दलका नेता कृष्ण प्रसाद यादवले पनि सोनल सरकारको पतनलाई ‘सरकारभित्रकै अन्तद्र्वन्द्वको परिणाम’ भने । उनले कांग्रेस लोकतान्त्रिक अभ्यासमा विश्वास गर्ने पार्टी भएको उल्लेख गर्दै भने, ‘हामीले संसदीय पद्दतिलाई सम्मान गर्दै आफ्नो भूमिका निभाएका हौं । सरकारमा रहेका दलहरूबीचको अविश्वासकै कारण यस्तो अवस्था आएको हो ।’

दुवै नेताहरूले सोनल सरकार ढल्नुलाई मधेश प्रदेशको सामान्य राजनीतिक प्रक्रिया भएको बताउँदै यसलाई अस्वाभाविक रूपमा प्रस्तुत नगर्न आग्रह गरे ।