जनकपुरधाम, २२ कार्तिक । मधेश प्रदेशका मुख्यमन्त्री जितेन्द्र प्रसाद सोनलको राजीनामा प्रदेश प्रमुख सुमित्रा सुवेदी भण्डारीले स्वीकृत गरेकी छन् ।

विश्वासको मत लिने सुनिश्चितता नदेखिएपछि शनिबार प्रदेशसभा बैठकमै राजीनामा दिएका सोनलको पद संविधानको धारा १६९ को उपधारा (१) को खण्ड (क) बमोजिम खाली भएको हो ।

प्रदेश प्रमुखको कार्यालयका निमित्त सचिव शत्रुधन यादवका अनुसार मुख्यमन्त्री सोनलको राजीनामा स्वीकृत भएसँगै संविधानको धारा १६९ को उपधारा (३) बमोजिम अर्को व्यवस्था नभएसम्म हालको मन्त्रिपरिषद्लाई कार्यवाहक जिम्मेवारी दिइएको छ ।

अल्पमतमा परेपछि तत्कालीन मुख्यमन्त्री सतिश कुमार सिंहले असोज २८ गते पदत्याग गरेपछि असोज २९ गते सोनल पाँच दलको समर्थनमा मुख्यमन्त्री नियुक्त भएका थिए । नेपालको संविधानको धारा १६८ को उपधारा (२) अनुसार नियुक्त भएका सोनलको कार्यकाल २५ दिनमै समाप्त भएको हो ।

सोनल नेतृत्वको सरकार विश्वासको मतका लागि बोलाइएको बैठकअघि नै राजनीतिक संकटमा फसेको थियो । गठबन्धनभित्रको असन्तुष्टि, जनमत पार्टीका दुई सांसद र संघीय समाजवादीकी सांसद बिमला अन्सारीको अनुपस्थितिले सरकार अल्पमतमा परेको थियो ।